Testspørsmål i tida

Avisa Dagen konkluderer i papirutgåva laurdag 5/4-25 i sin leiarartikkel, med at homofili faktisk er eit testspørsmål i høve til haldninga til Bibelen si autoritet. Eg er ikkje usamd med Espen Ottosen i dette.

Når eg leste denne leiarartikkelen kom eg til å tenkja på at for mange år sidan var det eit anna spørsmål som i denne avisa vart omtalt som eit testspørsmål i høve til autoriteten til Bibelen. Det var spørsmålet om kvinnelege prestar. Mykje har skjedd i samfunnet vårt sidan dette spørsmålet dukka opp i avisspaltene for fyrste gong. Etter mitt syn er det er mange problemstillingar Bibelen gjev klare svar på, som har vore oppe til diskusjon i mediespaltene opp gjennom åra. 

Mange av desse problemstillingane er nå lagt døde eller tilnærma døde. Dei er vel ikkje lagt døde fordi dei ikkje lenger er aktuelle, men snarare fordi som det heiter, at me i dag har komme lenger. Me lever jo i 2025. I tillegg til spørsmålet om kvinnelege prestar, gjeld det for eksempel; abort (med unntak av når grensene blir utvida), sex før eller utanfor ekteskapet, gjengifte, vår materielle livsstil og at det er ei evig fortaping for dei som ikkje tek imot Jesus som herre og frelsar.