Tid for å ta bort eigedomsskatten

Prioritering kan vere ei krevjande politisk oppgåve, men det er likevel ei nødvendig oppgåve. Konservativt vil framover arbeide for å gradvis fjerne eigedomsskatten og vil vise kvifor det er nødvendig.

Eigedomsskatten blir ofte innført på grunn av dårleg kommuneøkonomi. Den kan fjernast, men det krevst vilje til å omprioritere. Det er på ingen måte lett, men det er mogleg. Eigedomsskatten bør fjernast gradvis med ein fast reduksjon kvart år.

For næringslivet er eigedomsskatten ekstra økonomisk tyngande som styresmaktene kan gjere noko med, men vel å la vere. Dei siste åra har regjeringa overgått seg sjølv i auke i skattar og avgifter, så mykje at ein straum av kapitaleigarar har flykta frå landet. Den borgarlege opposisjonen held seg stille i båten. Dette må snu.

I kommunevalet, som no ligg framfor oss, så kan vi gjere noko med eigedomsskatten. Vi treng verdiskaping. Vi treng private initiativ som går med overskot og skaper nye arbeidsplassar. Det er styresmaktene oppgåve å leggje til rette for næringslivet, ikkje å motarbeide privat initiativ. Vi treng eit kommunestyre i Ålesund som set pris på og legg til rette for næringsverksemd og bedrifter som kan skape økonomisk vekst. Private bedrifter gir tryggleik og glede både for tilsette, familiar, nærmiljø og for kommunen.

Eigedomsskatten straffar i tillegg bustadeigarar som allereie betalar mykje for sine eigne eigedommar. Bustadkostnadane utgjer normalt den største delen av kostnadane ein har for å leve. Eigedomsskatten på toppen av alle dei andre kostnadane er øydeleggjande for vanlege menneskes økonomi. Det er ikkje berre urettferdig å straffe menneske som allereie har investert mykje tid og pengar i eigen heim, det er destruktivt for samfunnet.

Vi står fast ved kjernefamilien og dei to kjønn!

Eigedomsskatten tar heller ikkje omsyn til kor mykje du tener. Den rammar blindt både fattige og rike, og har lite eller ingenting med bustadeigar si inntekt å gjere. Eldre som lever på minstepensjon blir ramma hardt, særleg viss dei har mista ein ektefelle. Huset eller leilegheita dei bur i har blitt dyr nok for dei med høge straumprisar, forsikringar og vedlikehald. Det er grunnleggjande gale at det offentlege skal krevje skatt for at dei ikkje bur i leigd bustad, eller i kommunal bustad.

Eigedomsskatten straffar menneske som ønsker å klare seg sjølv, og kan i verste fall bidra til å tvinge menneske med svak økonomi til å selje heimen sin. Vi treng å senke eigedomsskatten, og fjerne den. Til å gjere dette så trenger vi truverdige parti og representantar som er i stand til politisk styring. Konservativt er eit avklart borgarleg, og eit tydeleg alternativ som vil prioritere å redusere eigedomsskatten. Det er tid for å redusere kostnadane for eigne innbyggjarar. Det er tid for å tenkje nytt. Det er tid for å stemme Konservativt.