Tre skip med jødelast

Transportskipet DS «Donau» har vorte sett på som symbolet på holocaust i Noreg. 26. november 1942 er dagen då det gjekk ut frå Oslo med over fem hundre norske jødar. Vegen gjekk direkte til nazistane sine dødsleirar. Donau har komme i eit heilt eige lys, av di det var dette skipet som frakta klart flest jødar vekk frå Noreg og inn i døden. Men det var to andre skip i tillegg som hadde same type last, og med same mål. Lat oss sjå litt på dei alle tre.

Monte Rosa

Den første frakta av norske jødar gjekk nemleg alt 20. november 1942 med MS «Monte Rosa». Det var frå starten eit passasjerskip, med sine 13.880 bruttotonn. Litt inn i andre verdskrigen vart det rekvirert av nazistyresmaktene og omgjort til troppetransportskip. Oppgåvene var å frakta tyske troppar til og frå Noreg, og jødar og andre fangar til Tyskland/Polen.