Vekkinga som merka meg for livet

Då eg var tidleg i tenåra var det ei stor vekking i Høyland kyrkje, som eg sokna til. Det var generalsekretær i NMS, Johannes Skauge, som Gud brukte til å utløysa denne vekkinga som starta om hausten 1956 og varte heilt til neste sommar. Over sju hundre menneske kom til tru og liv i Gud i denne vekkinga. Det var om lag ti prosent av innbyggjarane i Høyland kommune, og viser kor stort omfang denne åndelege oppvakninga hadde.

Det som skjedde i denne vekkinga merka meg for livet. Vi trong minst ein halvtime å gå for å nå fram til Høylandskyrkja, men eg trur eg gjekk mest kvar einaste kveld. Vi unge sat ofte på galleriet, for då kunne vi følgja med på kven som gjekk fram til altaret for å bli frelst.

Eg gløymer aldri da elektrikaren i bygda, som var periodedrankar/alkoholikar, gjekk fram for å gje seg over til Gud. Då gjekk det eit forunderleg sus gjennom forsamlinga. Eller når kolonialhandlaren, som var austlending og aldri hadde sett sin fot i bedehuset, lutande gjekk fram og bøygde seg ved altaret. Det var eit verkeleg under.