Debatt
TIDA GÅR: Vi står overfor ei stor utfordring når det gjeld tidsbruk og merksemd overfor dei vi er saman med, skriv Anne Kristin Bruns.
Adobe Stock
Vil du vera den «kjipe forelderen» som tør?
Det er lett å gje opp og ikkje orke å vere den forelderen som held igjen på aldersgrenser og barnas tidsbruk på sosiale medier.
Eg kjenner enno kjensla i magen. Den var ikkje god. Eg hadde bestemt meg for å setje grenser for mine born om at dei ikkje fekk vere på sosiale medier før dei var 13 år, og at dei ikkje fekk spele spel med aldersgrense som dei var for unge til. Kva gjer eg med barnet mitt? Blir det utanfor? Korleis skal eg klare å stå imot presset?
Eg klarte det med ulikt hell, og har kjent på opplevinga av å mislukkast nettopp her. Eg var ikkje tøff nok. Og nå, ti år seinare, ser vi kva dramatiske konsekvensar vår manglande bevisstheit har fått for samfunnet.
Jammen skal du som forelder vere tøff når du skal stå opp og argumentere om grenser og rutinar for korleis bruke smarttelefon, speling på nettet og sosiale medier generelt. Vi veit at vi har ei aldersgrense, og vi veit at det er grunnar for at ein skal halde den, men når det er eit stort press, er det lett å gje opp og ikkje orke å vere den «kjipe forelderen» som held igjen på nettopp aldersgrense og tidsbruk.
