Andreas Rege i Sola er død

Ein heidersmann i Guds rike har flytta heim til Jesus.

Han var tett på å skulle bli 100 år, født 23. januar 1923. Men Herren ville det annleis og tok Andreas Rege heim til seg 8. august i førre månad. Han fekk berre nokre dagar på SUS, og den siste veka på Soltun Sjukeheim på Sola. I dødsannonsen står det «døde stille i troen på Jesus».

Gravferda var frå Ræge kyrkje 23. august, og det var mange som ville ta avskjed med ein trufast og gild misjonsmann – ein mykje avhalden familiefar og stor flokk av barneborn (12 stk.) og 24 oldebarn. I kyrkja var det vakker solosong av barnebarnet Iren Jakobsen.

Trufast misjonsmann

Andreas Rege var ein gild og trufast misjonsmann. Han var den siste av syskenflokken på seks, etter foreldra Marie og Henrik Rege. Familien dreiv gardsbruk, og nå er det 4. generasjon som eig og driv garden, med den same flid som både farfar og oldefar og slekta før har drive.

Det var kjekt å høyra Andreas fortelja kor glad han var fordi han fekk Klara som kone. Ho var fødd Hodne i nabobygda og dei gifta seg i Bore kyrkje på Klepp i 1949. Dei fekk fire born; Harald (g.m. Joan), Møyfrid (Geir), Gunnar (Turid) og Helga (Jan). Mor deira døydde i 2014.

Borna fortel med glede om alle forkynnarar som mor og far gav husrom og godt stell. Ein sa at «Det var som me hadde krinsmøte heime hos oss mange gonger i året. Eg trur alle av dei reiste både mette og utkvilte til dei neste møta dei skulle ha.»

Brubyggjar mellom kyrkje og bedehus

Andreas var ein brubyggjar om arbeidet mellom kyrkje og bedehus. Forkynnarar frå mange organisasjonar vart ynskt velkommen, og spesielt var det IMF Rogaland (tidlegare Ryfylke og Jæren Indremisjon) som stod han nær. Saman med Misjonsselskapet.

Søndagsskulen i meir enn 40 år

Andreas hadde medansvar for søndagsskolen på Emmaus bedehus i 40 år. I tillegg var han også med i Yngres, og stod også mykje for arbeidet for dei vaksne. Andreas hadde god bibelkunnskap, og det var spesielt i Det gamle testamente. Der var han på høgde med dei som hadde «høgskule» i teologien, var det ein som sa til meg. Han var gild å snakka med om åndelege spørsmål.

Det er strake vegen heim

For cirka 20 år sidan blei eg kjent med Klara og Andreas. Eg hadde då budd 40 år på Austlandet og Sørlandet. Ein dag møtte eg han på Mega Sola, og han ville eg skulle starta med å skriva fast i Solabladet. Dei bør ha andaktar der som Aftenbladet har hatt i 100 år, sa han! Etter ei tid fekk eg mail frå nåverande redaktør med spørsmål om dette. Eg svara ja, og til nå har det blitt 114 slike «Til ettertanke». Den første stod på trykk 26.10.2017. Og Andreas har teke vare på alle utklippa.

Eg takka Andreas fordi han hadde vore tru mot det kall han hadde fått frå Herren. Då såg han på meg, smilte og sa: Det skulle då berre mangla. Jesus har gitt meg alt eg treng for himmel og jord, og eg gler meg til å få møta han att i Himmelen! Det er strake vegen heim!