Audun Mosevoll (1947–2022)

Det var med vemod og sorg me tok imot melding om at Audun Mosevoll sovna stille inn på Haraldsplass Diakonale Sykehus Kristi Himmelfartsdag, 26. mai. Det kom ikkje heilt uventa ettersom Audun i lang tid hadde kjempa tappert mot kreftsjukdom og følgjer av denne vonde sjukdomen. Og likevel var det ei trist og vemodig melding å få.

Audun vaks opp i Eidsvåg i Åsane og allereide som sjuåring gav han ut si første avis. Retninga for Audun sitt yrkesval ser ut til å vera lagd allerede her. Som ungdom vart Audun elev ved Framnes Folkehøgskule, og her møtte han Elisabeth f. Bjordal Strand som seinare vart hans ektefelle, nære ven og medvandrar i gode og vonde dagar.

Dei har i dag fire vaksne barn med ektefeller, og heile 13 barnebarn som Audun var svært stolt over og oppteken av.

Etter gymnaset gjekk turen til Fjellhaug Bibelskole i Oslo og han blei så hanka inn som «lærling» i avisa Dagen under redaktør Arthur Berg. Frå 1969 til 1972, og 1976 til 1984 arbeidde Audun Mosevoll som journalist i avisa, ein periode også som nyhetsredaktør.

Han viste seg raskt som ein dyktig og sakleg journalist med teft både for lokale saker og nytt frå næringslivet.

Grunna intern strid var Audun sin utgang frå Dagen ikkje utan smerte, men han tala likevel godt om Dagen og oppdraget denne avisa har i det norske samfunnet. Heilt opp til sjukdomen tok overhand, var han også ein flittig bokmeldar som leverte velfunderte vurderingar av mange typer bøker.

I Dagen-miljøet ser dei på Audun Mosevoll sin innsats med respekt, og han måtte gå nokre harde rundar internt på 1980-talet for å gjera avisa til det ho er i dag, eit viktig nyhetsorgan for Kristen-Norge.

Etter tida i Dagen tok Audun Mosevoll familien med seg til Stavanger og byrja eit viktig arbeid i Det norske Misjonsselskap . I 10 år fekk NMS glede av Audun sin dyktighet som journalist og leiar. Han var redaktør for ungdomsmagasinet Ny Horisont i fire år, og i seks år var han redaktør for Misjonstidende, NMS sitt sentrale organ.

I 1990 gjekk reisa attende til Askøy og Bergen og Audun vart Informasjonsleiar ved Norsk Lærerakademi, i dag NLA Høgskolen (NLA). Med tilsetjinga av Audun Mosevoll fekk NLA ein dyktig og røynd journalist som ansvarleg for informasjonsarbeidet.

Bladet «Hilsen fra Norsk Lærerakademi» som allereide i 1980 hadde eit opplag på 35.000, fekk ei fornying både innhaldsmessig og i layout. Bladmannen Audun fekk bruka alle sine evner som skribent, fotograf og redigerar.

Opplaget auka betydeleg og det vart i tillegg produsert mange ulike små hefte og kort som vart sendt til NLA sine trufaste gjevarar. Han vart også ansvarleg leiar for NLA-forlaget som i ein lang periode gav ut bøker og dr.avhandlingar.

Både i tida som tilsett ved NLA og seinare som pensjonist, skreiv Audun Mosevoll fleire bøker, mellom anna om misjonæren Nils Skjælaaen, to velreflekterte andaktsbøker, saman med AsbjørnTveiten ein biografi om Dagen-redaktør Johannes Lavik, eit lite hefte om sin eigen oppvekst «Under Orretua» og fleire andre hefte og bidrag.

I samband med NLA Høgskolen sitt 50 års jubileum i 2018 var han biletredaktør og medlem av referansegruppa til boka «Frå akademi til høgskule». Og etter at han og Elisabeth bygde seg hus på Raknes på Osterøy, var han ein periode redaktør av lokalbladet Hjellviknytt som Hjellvik Grendaråd på Osterøy gir ut.

Audun Mosevoll si store interesse for utviklinga av alle deler av det norske samfunnet, førte også til at han som pensjonist vart vald inn i kommunestyret på Osterøy som representant for KrF.

Sjølv om sjukdomen bar mange plager med seg, var Audun likevel stadig oppteken av i bidra med oppbyggeleg preiker og kåseri rundt om i nærmiljøet. I tillegg var han ein god og nyttig hjelpesmann i Elisabeth sitt omfattande gartnerarbeid på friland og i drivhus.

Det er mange i NMS, i Dagenmiljøet, på NLA, i lokalmiljøet på Osterøy og langt utover i by og bygd som kjenner sorg og saknad ved Audun Mosevoll sin bortgang. Han vann seg mange vener og var høgt akta som menneske, som formidlar og som skribent.

Ei stor takk til Elisabeth og familien som også opna opp for kontakt med Audun i den siste vonde tida då kreftene minka og livet gjekk mot sin slutt. Det var vemodig og vakkert å ta avskjed med Audun på Haraldsplass Diakonale Sykehus i Bergen.

Fred over Audun Mosevoll sitt minne.