Han fann løysinga

Det var med sorg vi sist helg fekk melding om at Gerhard Malvin Vik er død, 84 år gammal. No går tankane våre til Inger-Lise, dei seks barna, svigerbarna og dei 13 barnebarna.

Gerhard Vik vaks opp på Vik i Øygarden saman med foreldre og seks søsken. Etter å ha gått på Frekhaug ungdomsskule (no Nordhordland folkehøgskule) tok han utdanning i kommunal forvaltning på Kommunalhøgskolen. Han var formannskapssekretær i gamle Herdla kommune og gamle Øygarden kommune. På 1960-talet var han i ein periode rådmann i Suldal kommune. Det var likevel i byggjesaksavdelinga i Bergen kommune at Gerhard hadde sin lengste arbeidsbolk. Der arbeidde han fram til han vart pensjonist.

Han gifta seg med Inger-Lise Hobbel i Oslo i 1972. Dei første åra budde dei på Laksevåg. I perioden 1974 til 2021 var det busett på Kleppestø på Askøy. Men banda var sterke til barndomsheimen på Vik, og dei siste åra har Inger-Lise og Gerhard budd der.

I arbeidslivet og i det frivillige arbeidet var Gerhard problemløysaren. – Ta ein prat med Gerhard, sa medarbeidarane gjerne når dei ikkje sjølv klarte å løysa ein floke. Det handla om å jenka seg litt og lirka det til og finna ei løysing alle kunne leva med. Det var ikkje kjenslene som skulle vera styrande for konklusjonen i ei vanskeleg sak, men sunn fornuft. Slike eigenskapar kom godt med i krevjande nabosaker og andre konfliktsaker. I dag er det mange av oss som takkar Gerhard for at han løyste opp knuten. Det var hans måte å hjelpa oss på. Han var ein meister i å visa omtanke gjennom konkret handling.

Desse gode eigenskapane tok han meg seg over i det frivillige arbeidet. I ein periode representerte han KrF i formannskapet og kommunestyret i Askøy. Gjennom styreverv i Askøy Tidend, Misjonsheimen, Skogliheimen, Kystradioen og fleire frivillige organisasjonar var det god bruk for den saklege, tenkjande og løysingsorienterte Gerhard Vik.

I Kystradioen hadde han i ein periode formelt styreleiarverv, men brukte mest tid på å vera frivillig medarbeidar der han hadde ansvar for nyheitsprogram, debattprogram og program om kultur og kristenliv. Han var ein tolmodig gravande journalist som også gav oss andre journalistar mange godsaker. Val av intervjuobjekt var nøye gjennomtenkt. Han trekte ofte fram personar som hadde møtt på store utfordringar i livet.

Gerhard Vik hadde med seg ein haugiansk grunntanke der det var god plass til både Vår Herre og det timelege. Han var ein berar av tradisjonelle kystkulturverdiar der nøysemd, fellesskap, bedehus, bibel og bøn var sjølve livsfundamentet. Han gav mykje av seg sjølv for fleire kristne lag og organisasjonar. Eit døme på dette var korleis han saman med gode hjelparar fekk rusta opp fiskarheimen på Røst. Ved å ta initiativ til lokale kulturarrangement på bedehuset bidrog han til å byggja bruer og skapa tettare kontakt mellom bygdefolket. Han var tydeleg på kva han stod for, men han hadde samstundes eit demokratisk grunnsyn som skulle sikra eit ope og fritt ordskifte.

Sjølv om Gerhard brukte mykje tid på å hjelpa oss andre, var den nære familien det viktigaste og kjæraste for han. Det viste han både i ord og handling.

Fred over dei gode minna etter Gerhard Vik.