Johannes H. Fosse til minne

Så har gode Johannes fått lagt ned vandringsstaven, nær 97 år gammal. Me er mange som kjenner på takk for alt han har vore for oss – på så mange område – gjennom eit langt og innhaldsrikt liv. Johannes var ein bauta – med glimt i auga! Så livsglad, kunnskapsrik, omsorgsfull, allsidig, interessert og engasjert i alt samfunnsgagnleg arbeid, og med den hukommelsen!

For oss i Meland var han «vår», sjølv om engasjementa hans rakk langt utover kommunegrensene. Han var ordførar i Meland i nesten 12 år, vald inn for KrF, og samarbeid var nøkkelord i alt, både i Nordhordland og elles. Johannes var i dobbel forstand ein brubyggjar. Han visste at all utbygging av infrastruktur treng samarbeid, anten det er snakk om samferdsel, elektrisitet eller vassforsyning, og det synte han i praksis gjennom sin innsats på alle desse områda.

I smia og på talarstolen, i songkor og med vener i Rotary, på golfbana, i møte med styresmakter og på seniortreff, saman med familien som han var så glad i, på tur i inn- og utland – overalt var han like heilhjarta til stades og viste at nettopp dette betydde mykje for han.

Det var alltid like interessant og sterkt å høyra Johannes fortelja frå krigstida. Han minna oss på kor viktig det er å ta vare på og verna om fridommen vår, og æra dei som kjempa for at me i dag kan leva i eit fritt land.

For sin store samfunnsnyttige innsats vart han heidra med Kongens fortenestemedalje.

24. september døydde han fredfullt.

I djup takksemd for alt Johannes har betydd for oss alle, lyser me fred over Johannes H. Fosse sitt rike og gode minne!