Johannes Kleppa 70 år: En sjelden og viktig hyrderøst

Johannes Kleppa runder 70 år den 12. mai. Han har gjennom desse åra hatt ei lang rekke med verv og oppgåver innanfor Guds rikes arbeid. Han har vore Bibelskulelærer ved Bildøy og ved Fjellheim.

Han har og vore tilsett i Santalmisjonen og i Indremisjonsforbundet. I fleire år var han medredaktør i Dagen saman med Odd Sverre Hove. Johannes har skrive fleire bøker og ein mengde artiklar. Framleis er han i full teneste som styreformann for Misjon Sarepta.

Sjølv har eg fått lære han å kjenne gjennom å lese hans mange artiklar, lytte til hans forkynning og nå i seinare år i samarbeid i Misjon Sarepta.

Hans forkynning har vore prega av ei sterk tillit til Bibelen. Men han har ofte peika på at Bibelen har eit sentrum, og det er Kristus krossfest. Forkynning er naudsynt og avgjerande for kristen modning og vokster, difor har Johannes også vore ein sterk talsmann for kor viktig det er å samlast for å høyre Guds Ord. Johannes kan tale enkelt, slik at barn kan forstå, men han kan også gå i djupna, slik at øvde akademikarar må konsentrere seg. Fleksibiliteten i tema er stor.

Johannes har funne seg åndeleg heime i bedehuset og har vigd det meste av si tid til dette arbeidet. Her har forkynninga vore sentral, og det sentrale i forkynninga har vore Kristus.

Han har stor Bibelkunnskap, men også stor kunnskap i kyrkjehistorie og filosofi og er særs oppdatert på det norske kyrkjelandskapet. Det meste er sjølvlært, og ei frukt av hans kjærleik til kunnskap og bøker. Særleg har han poengtert korleis pietismen har vore til velsigning for landet.

Som rektor på ein kristen skule, fekk eg mange gonger glede av å invitere Johannes. Han var brennande opptatt av dette, og vi opplevde stor støtte frå hans side. Så sant han hadde høve, kom han. Han ville gjerne støtte den kristne skulen, og er framleis ei varm støtte til dette arbeid.

Mange har lagt merke til hans gode og klare penn. Han har skrive eit utall artiklar i aviser, flest i Dagen. Dei siste åra har han skrive ein artikkel kvar veke på Misjon Sarepta si nettside. Desse «ettertankane» gir ein hjelp til å tenke kristeleg rett om ting som er oppe i tida.

Her er Johannes heilt sjeldan, og er ei viktig hyrderøyst i vår tid. Vi har ikkje mange slike i Noreg. Vi får gjennom desse hjelp til å tenke rasjonelt. Hans grunn for tenking er ikkje festa i fornufta, men i Bibelen. Men her får fornufta fotfeste, og då blir vi betre i stand til å tenke klart.

Johannes fekk tidleg eit kall til misjon i Spania. Eit sterkt vitnemål frå ein person på Lausanne konferanse gav dette kallet til Johannes for mange år sidan. Når så Misjon Sarepta vart starta med tanke på misjon i Spania, var det naturleg for han å bidra i dette arbeidet. Her har eg også fått glede meg over eit tett samarbeid med Johannes.

Johannes er svært ryddig i tanken, visjonær og alltid optimistisk. Han er svært allsidig, og kan både skrive, forkynne og snekre, og så spring han frå dei fleste på halvmaraton. Sarepta har som slagord: «Ha tru til Gud». Dette pregar Johannes i alt han gjer og tenker. Og så gjer det heller ikkje noko at han er ein svært så likande kar som spreier glede og humør rundt seg.

Me dette ønsker vi å ønske jubilanten Guds signing over livet og æva.