Maria Harriet Hagesæter til minne

Maria Harriet Hagesæter har gått heim til sin Frelsar 87 år gamal. Maria fekk eit langt og aktivt liv i fleire viktige funksjonar og oppgåver gjennom livet. Ho vaks opp ved Nørvasundet i Ålesund saman med tre brør. Foreldra var Klara og Johannes Hagesæter. Faren var styrar ved Møre Ungdomsskule, i dag Ålesund Folkehøgskole. Klara og Johannes var aktiv med i alt misjonsarbeid, og Maria fekk nok med ein god ballast frå heimen i det allsidige livet ho skulle få.

Etter artium tok Maria agronomutdanning ved Lyngdal Jordbruksskule, for deretter å fullføre lærarutdanninga ved Volda Lærarskule. Maria fekk utnytte si utdanning og sine kunnskapar på fleire viktige områder.

Den lengste tida ved sosiallinja ved Borgund Folkehøgskule, i dag Ålesund Folkehøgskole. Her var ho i tilsaman 13 år, frå 1966 – 1922, fordelt på fire periodar. Kanskje ho kjende på eit ansvar for å ta vare på arven etter faren, Johannes? Inn i mellom hadde ho oppgåver både ved Familierådgivingskontoret i Ålesund kommune og som sosialkurator ved Sentralsjukehuset i Ålesund. I 1993 flytta ho til Odda der ho var sosialkonsulent ved psykiatrisk poliklinikk ved sjukehuset der.

Maria var eit overskotsmenneske. På ein god måte nytta ho sitt overskot til ære for Jesus sin Frelsar, og til velsigning for sine medmenneske. Ho var den første teen-åringssekretæren i Sunnmøre Indremisjon. Saman ungdomssekretær Oddhild Grønningsæter fekk dei utføre ei stor oppgåve mellom dei unge. Maria var også ei drivande kraft for den såkalla «Geirangeraksjonen», eit evangelisk arbeid mellom turistane. Ein periode var ho også husmor ved Bjorli Bibelsenter.

Det som set igjen som eit sterkt minne frå Maria var hennar bønneliv. Ho nytta god tid, både i forsamling, og sikkert også i einerom, i bøn til Gud for folk og land. Ein ressursperson har gått heim til Gud, men hennar interesse, engasjement og omsorg for andre skal framleis bere frukter.

Vi lyser Guds signing over Maria Harriet Hagesæter sitt gode minne.