Annie (24), Jenny (23) og rekordmange andre unge på misjonskonferanse: – Vil dele nåden me har opplevd

– Eg har eit hjarte for menneske som ikkje har høyrt evangeliet. Eg vil dei skal oppleve kjærleiken og nåden eg sjølv har opplevd, seier Jenny Jensen (23) på Unådd-konferansen i Imikyrkja siste helga i oktober.

Etter eit opphald som utsending i Midtausten er ho tilbake i Noreg igjen, men ho vil tilbake.

– Når blir det?

– Spør Jesus, seier Jensen til applaus frå venninne.

– Han er svaret på alt, seier venninna, Annie Tahila Olsen (24).

Olsen håpar å bli utsending til Brasil.

– Eg vil bruke sjukepleiarutdanninga mi som eit verktøy til å nå menneske med evangeliet, seier 24-åringen.

Rekordmange påmelde

Målet med Unåddkonferansen er å styrke norske kyrkjelyder og organisasjonar sin innsats for å nå unådde folkegrupper med evangeliet.

Unådd starta som ein konferanse for Troens bevis, Asia link, Credokirken og Ibra i 2019.

Den gongen var det mellom 30 og 40 påmelde.

I år er situasjonen ein annan.

38 organisasjonar og kyrkjesamfunn er med på arrangørsida. 560 har kjøpt billettar på førehand, mot 239 i fjor.

Det er ny rekord.

Frå bistand til evangelisering

Allereie åtte dagar før konferansen gjekk av stabelen gjekk styremedlem Terje Høyland ut på Facebook og fortalde at «alle» skulle på Unådd.

Toppleiarar som Gunnar Bråthen (NLM), Helge S. Gaard (NMS) og Kjetil Vestel Haga (50) frå Normisjon er alle til stades.

Det same er Øystein Gjerme (Pinserørsla), Andreas Nordli (Ungdom i Oppdrag) og Hans Martin Skagestad (Troens bevis), for å nemne nokon.

Høyland opnar konferansen denne fredagen.

Han har høge forventningar til helga.

– Unådd er ein stad der det er vanskeleg å ikkje å få eit kall. Det er noko me har sett dei siste fem åra, medan konferansen var i Bergen, seier han og nemner fleire døme på utsendingar som har vakse fram etter Unådd.

Trenden går frå bistand til misjon, ifølgje Høyland.

– Me nærmar oss ein sunn balanse mellom bistand og misjon. Det er svært gledeleg.

– Kva skjer med eksisterande bistandsarbeid når misjon tar over?

– Eg trur ikkje det har blitt mindre bistand, berre meir evangeliserande misjon. Det er meir fokus på å gjera folk til disiplar, seier han.

Utforskar kallet

250 av Unådd-deltakarar er meld på eit eige ung-spor under konferansen. Denne gruppa er i hovudsak studentar og unge vaksne.

På agendaen her står seminar, gruppearbeid og workshops, som skal gjera kall og misjon meir handgripeleg for unge deltakarar.

Innhaldet har eit særleg fokus på unådde folkeslag.

– Me skal sjå nærare på korleis det ser ut å ha eit kall i dag, fortel Morten Berge til Dagen.

Han er ansvarleg for Unådd ung-sporet saman med Nadia Korneva.

Rekordpåmeldinga er ei frukt av å jobbe tverrkyrkjeleg, trur Berge.

– Dei ulike organisasjonane tar med sine. Samtidig er det noko som ulmar blant unge kristne i dag. Det er ein generasjon som reiser seg, som fortel om spesifikke land dei er utfordra til å dra til. Dei brenn for å gi Jesus vidare.

Likevel har mange unge har eit blanda forhold til kall og misjon.

– Nokon kan misforstå kva kall handlar om, men djupast sett handlar det om at vi alle er er kalla til å følgje Gud. På programmet har me ulike spor for dei som kjenner at misjon ikkje er noko for dei og for dei som har starta ei vandring og er nysgjerrig på å dra til utlandet, seier Berge.

Deler tips

Fredag ettermiddag får Unådd Ung-deltakarane praktiske tips frå eit ektepar som er langtidsutsendingar i eit område det ikkje er lov å drive misjon.

Deltakarane blir bedne om ikkje å ta bilde eller dele namna deira i sosiale medium.

Ekteparet råder deltakarane til å få eit bønneteam i ryggen før dei reiser ut. Vidare blir dei oppmoda om å lære seg språket og kulturen i området dei skal til, danne relasjonar og fylle ein rolle det er behov for i lokalsamfunnet.

Etter foredraget diskuterer ungdommane to og to kva dei kjenner seg kalla for og korleis dei kan handle i dag.

Klare til å gå

Jenny Jenssen og Annie Tahila Olsen gler seg til det som er i vente.

– Eg vil Gud skal knuse hjarte mitt meir for unådde folkeslag og få verdifulle relasjonar som eg kan connecte med vidare, seier Olsen.

Jennssen er einig.

– Eg vil få hjelp til å sjå menneske med Gud sitt blikk. Det me gjer som utsendingar skal ikkje vera for å innfri måla i ein strategi, men i kjærleik til dei me vil nå ut til, seier ho.

23-åringen frå Mandal er open for å dra til Midtausten igjen.

Utsendingar til land i dette området arbeider ofte som sjukepleiarar eller lærarar.

Dei blir kjende med lokalsamfunnet og deler trua si når venskap er danna.

– Viss du ropar gå gata stolar ikkje folk på deg, men når du har relasjon med folk i Midtausten er dei så opne. Dei vil høyre alt. Slik er det i Noreg og. Det er ikkje så vanskeleg, seier Jenny Jenssen.

Olsen ventar på at Gud skal gi henne klarsignal til å dra til Brasil.

– Akkurat nå er tanken å bli ferdig med sjukepleien, men eg har veldig lyst å reise til Brasil med ein gong, viss det legg seg til rette for det. Kortidsmisjonførst, og så langtidsmisjon etterpå, seier Annie Tahila Olsen.