Aslak Sira Myhre meinte kristne fokuserte for mykje på synd. No forstår han kvifor

– Om me alle er syndige, så vert synda ikkje framand – ho er tvert om ein grunnleggande, ubryteleg del av det å vere menneske – og då vert også tilgivinga heilt grunnleggande.

Det skriv nasjonalbibliotekar og tidlegare leiar for Raud valallianse (no Raudt), Aslak Sira Myhre i ein fersk gjestekommentar i Stavanger Aftenblad.

2015: – For mykje fokus på synd

Myhre har aldri vore kristen. Det var for mykje fokus på synd, meinte han.

Fleire gonger har han teke eit oppgjer med den sørvestlandske pietismen og arvesynda har var vitne til i heimfylket, Rogaland.

I 2015 sa han til Dagsavisen:

– På Jæren skal du ha dårleg samvit om du har det ekstra kjekt. Det sit veldig djupt i meg også, og eg skulle gjerne visst kor det kjem frå.

Det same var han inne på i 2017 i Aftenbladet:

«Ikkje ha det for godt. Du skal ikkje nyte for mykje, ete for godt, vere kåt, nøgd med deg sjølv eller bare lukkeleg – det er synd, synd, synd».

2017: – Mykje bra i Bibelen

Samtidig tok han, i sama saka, til orde for at Jesus også kan vere eit etisk ideal.

– Det er mykje bra det går an å hente ut av Bibelen. I alle fall frå Det nye testamentet.

Han hadde nettopp lese Bibelen igjen.

I dag er Myhre medlem i den regjeringsoppnemnde 1030-komiteen, som planlegg 1000-årsmarkeringa for slaget på Stiklestad.

Myhre er «nedslått» over at ikkje fleire har fått med seg at Magnus Lagabøtes frå 1274 står i ein kristen kontekst.

– Det tyder på at me, altså, Noreg har begynt å skrive ein del av den kristne historia vår ut av sjølve historien. At me, medvitne eller ikkje medvitne, har sekularisert fortida, sa han til Vårt Land i september.

2024: Ut mot woke

I den ferske gjestekommentaren Aftenbladet 9. november kritiserer Myhre fleire sider av det sekulære samfunnet.

Han reagerer på det han meiner er eit ideal om å vera feilfri.

Den offentlege fordømminga når feila blir avslørt, særleg på sosiale medium, råkar politikarar, kjende personar og vanlege folk hardt, ifølge Myhre.

Han tek eit oppgjer med woke-rørsla:

– Noko av det verste med woke-rørsla er at ho er heilt utan tilgjeving for feil, skriv han i kommentaren.

Han understrekar at det ikkje er gale å arbeida mot rasisme, sexisme eller undertrykking av folk på grunn av kjønn, identitet eller seksualitet. Tvert om.

– Men det er gale å forfølgja den rette tanken til det punktet at han vert den einaste tanken det er lov å tenkja. Og det er slik det kjennest i mange debattar no.

– Treng synd og tilgjeving

Dei siste åra har gitt Myhre eit nytt perspektiv på kristendommens filosofi.

– Menneske vil gjera feil, me vil koma til å misunna vår neste, me kjem til å fråtsa, irritera oss over foreldra våre, lyga og det som verre er, argumenterer Myhre.

I denne erkjenninga ligg det to ting som «me verkeleg treng i vår tid», ifølgje nasjonalbibliotekaren:

Det eine er erkjenninga av at me ikkje er feilfrie. Det andre er behovet for tilgjeving.

– Om me gjorde meir av det, og dømde mindre i den offentlege gapestokken, hadde me kanskje òg lært ungane våre å tilgje seg sjølve, konkluderer Aslak Sira Myhre.