Åtvarar menn mot å gjera dette i november – ikkje vegen å gå for ein kristen

«Fleire kristne ser porno. Færre vil slutte», melde Dagen nyleg.

Dette får Truls Olufsen-Mehus i Kristent ressurssenter til å reagere. I ein ny video åtvarar den tidlegare KrF-politikaren mot konsekvensar av pornobruk.

– Det gjer at vi ser potensialet for seksuelle handlingar overalt, med kven som helst og når som helst. Særleg for menn med sterk seksualdrift er det ein stor distraksjon.

Internett-kampanjen «No nut november» er eit godt høve til å få kristne til å sette søkjelys på problemet, meiner Mehus.

– Det er enklare når fleire gjer det, seier han til Dagen.

Kampanje mot sex og onani

«No Nut November» er ei årleg utfordring der deltakarar prøver å avstå frå onani og seksuell aktivitet gjennom heile november.

Kampanjen starta som eit humoristisk fenomen på sosiale medium, men for somme handlar det om å teste sjølvkontroll eller reflektere over eige forhold til pornografi og seksualitet.

Deltakarar deler ofte erfaringar og motivasjon på plattformer som Reddit og X, for å oppmuntre kvarandre til å gjennomføre utfordringa.

Mehus si «No Nut November»-utfordring gjeld heile året, ikkje berre i november. Utfordringa omfattar ikkje sex, men porno og onani.

– Det er jo ei kjensgjerning at onani fører til ei form for egoistisk tilfredsstilling. Det handlar ofte om at ein berre «fiksar det sjølv». I parrelasjonar kan det skape ei kløft. Uforløyste problem blir større.

Til iFinnmark, som omtalte videoen først, seier han:

– Det er ikkje vegen å gå for ein kristen.

Sexolog: – Meiningslaust

«No Nut November» er omstridd, også blant ekspertar.

Dagbladet siterer den amerikanske urologen Rena Malik, som meiner at ulempene med å ikkje ha utløysing på ein heil månad, er større enn fordelane.

– Mange menn kan oppleve smerter i bekkenbotnen eller testiklane, seier ho på YouTube.

Ho seier vidare at regelmessig ejakulasjon gir betre søvn, redusert hjarterytme og stress, i tillegg til ei auke i velværehormonar.

Malik får støtte av lege og spesialist i klinisk sexologi, Haakon Aars.

Han har tidlegare uttalt til same avis:

– Utfordringa blir rett og slett meiningslaus. Onanering er naturleg, sunt og normalt. Stoppar ein, er det under ei form for påført tvang. Det er usunt.

– Kan løysast med bøn

Olufsen-Mehus fortel han har fått ulike reaksjonar på utspelet sitt.

– Det ein del som synest det er provoserande at ein oppfordrar til sånne ting, men på Ung.no er det mange tenåringsgutar, som skriv at dei slit med dette. Sexologar svarer at dei berre skal halde fram. Det er eit rop om hjelp, men dei får ikkje hjelp, seier han.

Den ferske Konservativt-politikaren oppfordrar kristne par til å be saman for å løyse problem.

– Det minkar risikoen for å skiljast og aukar intimiteten.

– Har du sjølv tatt utfordringa i «No Nut November»?

– Ja. Eg slutta med porno for fem år sidan, etter eg blei kristen, seier Truls Olufsen-Mehus.