Auksjonerer bort bibel til 500 millionar kroner
Verket ligg an til å bli det dyraste dokumentet som nokon gong er seld.
Publisert
Sist oppdatert
Dei siste 40 åra har den eldste kopien av Den hebraiske bibelen, kjent som Sassoon-kodeksen, vore utilgjengeleg for offentlegheita.
No skal den stillast ut over heile verda og sidan auksjonerast bort.
Annonse
Første stopp er auksjonshuset Sotheby's i London frå 22. til 28. februar. Deretter vil verket bli vist fram i Tel Aviv, Dallas, Los Angeles og New York.
– Eit heilt unikt verk, seier Rune Arnhoff, leiar av Nordisk Bibelmuseum i Oslo.
Verdas eldste
For omtrent 1100 år sidan, i området rundt dagens Israel og Syria, sat ein skrivar og kopierte Den hebraiske bibelen.
Kopien enda ifølge auksjonshuset etter kvart opp i synagogen i Makisin, i dagens Syria. Men då synagogen vart øydelagd ein gong mellom 12- og 13-hundretalet, forsvann kodeksen.
Først fleire hundre år seinare, i 1929, dukka den opp igjen. Den kjente boksamlaren David Solomon Sassoon (1880–1942) kjøpte då dokumentet som seinare blei oppkalla etter han.
Sidan den gong har dokumentet blitt seld fleire gongar, men har heile vegen vore i privat eige.
Førre kjente eigar er den sveitsiske samlaren Jacqui E. Safra som kjøpte den i 1989, men auksjonshuset Sotheby’s som skal auksjonere bort verket, har ifølge Finansavisen ikkje avslørt den noverande eigaren.
Annonse
Avisa seier auksjonshuset håpar på å selje Bibelen til rundt 50 millionar dollar, altså rundt ein halv milliard norske kroner. I så fall vil det bli det dyraste dokument som nokon gong er seld.
– Heilt unik
Kodeksen er ifølge The New York Times den eldste, nesten fullstendige versjonen av Den hebraiske bibelen. Men ifølge Finansvisen har den ikkje før nyleg blitt vitskapleg undersøkt.
Rune Arnhoff, leiar av Bibelmuseet i Oslo, blei overraska då han fekk nyhenda om auksjonen.
– Eg tenkte: Kva, har ein funne ein så gammal, komplett hebraisk bibel. Den har jo vore kjent sidan 1929, men det er nok få som har kjent til at den har eksistert. Dette er nærast ei nyoppdaging, seier han.
Arnhoff har på sikt eit lite håp om at museet kanskje kan få låne kodeksen.
– Det blir spennande å følge med på kven som blir den nye eigaren og om dei ønsker å dele det unike verket. Eg skulle gjerne ha laga ei digital utgåve som kunne bli brukt til forsking og utstilling, seier han.
Det er Sassoon-kodeksen 1053 som no er til sals. Den må ikkje bli blanda saman med Sassoon-kodeksen 507, også kjent som Damaskuspentateuken.
Annonse
Ifølge Wikipedia er førstnemnde ei nesten fullstendig samling av heile Den hebraiske bibelen, Tanakh, som ein trur er frå mellom 800–900 talet. Mens sistnemnde er ei samling av dei fem mosebøkene, som på fagspråket blir kalla Pentateuken og er frå 900-talet.
