Bedehusguten Asle (20) blir realitydeltakar – mor var veldig skeptisk

– Eg ville sjå om eg dugde til anna enn å sitte heime hos mor og far.

Korset lyser opp i den solbrune halsen til Asle Haddeland, idet han ønsker velkommen inn i Kleppe bedehus i Rogaland.

Her har han brukt mykje av ungdomstida, først og fremst som deltakar, men etter han kom heim frå opphaldet i Kompani Lauritzen har han tatt på seg leiaransvar også.

Det er ikkje tilfeldig.

Trengde eit spark bak

Kompani Lauritsen er ein reality-serie, der ei gruppe kjendisar blir i innlosjert i ein militærleir for å bli «den beste versjonen av seg sjølv».

Deltakarane konkurrerer mot kvarandre i øvingar inspirert av opptaksprøver i Forsvaret. Tidlegare proffsyklist Dag Otto Lauritzen er med som oberst og programleiar.

I den kommande sesongen er kjendisane byta ut med unge vaksne, som alle treng eit spark bak for å få gang på livet.

Ein av dei er Asle Haddeland frå Klepp i Rogaland.

Då TV2 søkte etter deltakarar var Asle ferdig lærling som energimontør, hadde fast jobb og budde komfortabelt heime på guterommet, eit steinkast unna venene på bedehuset og i Frikyrkja.

Men kleppsbuen klarte ikkje heilt slå seg til ro med det.

– Det gjorde meg litt nedfor. Eg syntest det verka så trist å berre gjere det same resten av livet, fortel han.

Søstrene, som begge hadde vore på Disippeltreningskule (DTS), ivra for at broren skulle gjere det same. Asle sjølv nøla.

– Eg visste eg ville gjere mi eiga greie. Problemet var berre kva.

Så blei han tipsa av ei venninne om å søke Kompani Lauritzen. Eit lite håp blei tent.

Valde reality

TV2 likte det dei såg i bedehusguten frå Klepp, og han rykka stadig nærare ein plass på deltakarlista.

Asle og faren gira seg opp. Mora derimot, såg med skrekk og gru for seg yngstesonen som reality-kjendis.

– Jo lenger eg kom, jo meir blei ho sånn at ho sa ho håpa eg ikkje kom med.

Asle humrar.

– Ho var redd eg skulle tabbe meg ut og seie noko dumt – eller at eg skulle bli høg på meg sjølv. Og så lurte ho på kvifor eg som kristen skulle vere med i realityprogram.

– Det er det sikkert fleire som lurer på?

– Eg melde meg jo ikkje på fordi eg er kristen, men fordi eg kjende meg igjen i måten dei skildra deltakarane dei ønskte, påpeiker han.

Då det blei klart at Asle var tatt ut som deltakar stålsette seg han seg for krevjande konfrontasjonar om trua.

Innførte felles bøn

– Eg prøvde å praktisere det me lærer på søndagsskolen at me skal elske dei andre som oss sjølv og vise godheit og miskunn overfor kvarandre, fortel Asle.

Den gylne regel hadde han heile tida i bakhovudet. I tillegg hadde han god støtte frå meddeltakar, Elisa Vagle, som og er kristen og frå nabokommunen, Sandnes.

– Det overraska meg at folk var så lite konfronterande. Det blei jo spørsmål om homofili og abort, men alle var respektfulle til kva me hadde å sei, og me var respektfulle overfor dei.

På tv-programmet Farmen fekk sjåarane oppleve prest Thor Håvik døype deltakarar. Året etter følgde Dagen-redaktør Vebjørn Selbekk opp med bøn.

Asle kan røpe at det var god plass til andeleg innhald i kompaniet.

– Det blei ein tradisjon kvar natt å be Fader vår saman, og så tok eg ei lita bøn for dei andre på rommet mitt. Eg lærte til og med ein salmesong av dei som ikkje var kristne. Det var verkeleg stilig. Det hadde eg ikkje trudd.

Lærte å ta ansvar

Kompani Lauritzen blei spelt inn i mars. Nå, eit halvt år, seinare bur Asle framleis heime på guterommet og er tilbake i same jobben, men noko har endra seg.

– Eg oppdaga at eg kunne vere ein leiar, sjølv om eg alltid har halde meg litt i bakgrunnen og latt dei andre styre, fortel 20-åringen.

På Kleppe bedehus er han blitt vaksenleiar på Ungdomsforeininga og styrer lyden. I Frikyrkja er han blitt ansvarleg for oppussinga.

– Oppnådde du det du ønska med deltakinga?

– Før blei eg ofte sittande å tenkje på ting eg skulle ønske eg gjorde. Der inne fekk eg sett meg sjølv på prøve. Eg innsåg at med pågangsmot går det meste.

Dei neste to åra er planen å jobbe for å tjene pengar til å reise ut og sjå verda på eiga hand. Deretter vil han studere i ein annan by.

– Eg trur – eller nesten veit – eg kjem til å klare det, fastslår kleppsbuen.

Overtydde familien

24. oktober debuterer Asle Haddeland på TV saman av resten av gjengen i Kompani Lauritzen. Det står att å sjå om det då blir reality-premiere på Kleppe bedehus for første gong i historia.

Og for dei som lurer; nå gler heile familien Haddeland seg til å sjå Asle i aksjon på TV-skjermen.