Blei arrestert for stille bøn på gata. No får ho erstatning frå politiet
Glad for forlik og kompensasjon, men fryktar det kan skje igjen.
Publisert
Sist oppdatert
To gonger slo britisk politi til mot Isabel Vaughan-Spruce (46). Begge gongene var «brotsverket» hennar at ho ba stille bøner for ufødd liv på eit fortau i Englands nest største by, Birmingham.
Ein av arrestasjonane er filma, og videoen er sett fleire titals tusen gonger.
Annonse
Vaughan-Spruce er katolikk, abortmotstandar og frivillig medarbeidar på eit senter for vanskelegstilte kvinner.
Dagen har omtalt saka hennar fleire gonger.
Får erstatning
Ho ser på arrestasjonane som brot på menneskerettar og trusfridom og kravde erstatning frå politiet. Den kristne juristorganisasjonen ADF UK, som har støtta henne i kampen, opplyser at ho får 13.000 pund frå West Midlands Police.
Beløpet svarar til rundt 180.000 norske kroner.
Ho har tidlegare fått ei orsaking frå politiet.
Vaughan-Spruce har hevda at arrestasjonane var urettelege og reagerer sterkt på at ho blei kroppsvisitert og ransaka. Ho omtalar avtalen med politiet som eit forlik, men er redd det same kan skje igjen.
– Det er ikkje plass til Orwells «tankepoliti» i Storbritannia i det 21. hundreår, seier Vaughan-Spruce med referanse til den dystopiske romanen «1984».
Annonse
Her skildrar forfattaren George Orwell eit totalitært samfunn med overvaking og statleg undertrykking av einskildmennesket.
– Eg er glad for at politiet erkjenner dette, seier kvinna.
Buffersoner
Rundt den aktuelle abortklinikken i Birmingham har kommunen etablert ei såkalla buffersone, der det ikkje er lov å prøve å påverke abortsøkjande kvinner.
Nyhendet om forliket kjem samstundes som den nye Labour-regjeringa seier dei vil styrke tryggleiken rundt sjukehus som utfører abort og forsterke ordninga med buffersoner rundt desse anlegga.
150 meter frå bygningane skal det ikkje vere høve til å «påverke». Vaughan-Spruce er mellom dei som meiner det er uklart kva dette betyr og fryktar det kan bli travle tider for politiet.
Første «tankekrim-saka»
ADF omtaler arrestasjonen og fengslinga av Vaughan-Spruce som den første «tankekrim-saka» i Storbritannia i dette hundreåret. Ho blei arrestert to gonger, i desember 2022 og mars 2023.
Annonse
Den siste arrestasjonen fann stad berre nokre veker etter at ho var frifunnen i retten. ADF skriv at heile seks polititenestefolk deltok i hendinga, og den eine skal ha sagt: «Du har sagt at du deltar i bønn, og det er lovbrotet.»
– Mindre mangfald
– Stille bøn er ikkje eit lovbrot. Ingen bør arresterast berre for tankane dei har i hovudet. Likevel skjedde det to gonger med West Midlands Police. Dei sa rett ut at «bøn er ei krenking», seier Vaughan-Spruce.
