Bonden Ingar (67) samla inn nesten to millionar kroner til misjonssjukehus på ein kveld

– Eg er berre ein liten «ollefant» som drøser med folk og snakkar pengar, seier Ingar Kvia.

«Ollefant» er ein som kavar mykje. I Kvia sitt tilfelle har «ollinga» gitt store resultat.

Førre veke arrangerte 67-åringen auksjon, saman med den NRK-aktuelle cowboyen, Arvid Mæland.

Ei omdiskutert Erling Braut Håland-statue i tre, puppekoppar og utstoppa dyr var blant gjenstandane jærbuen punga ut for på auksjonsdagen.

Fengar «heile» lokalsamfunnet

1,85 millionar kroner drog Kvia og kompanjongane hans inn på auksjonen, opp 800 000 frå fjorårets sum.

– Her har vi arbeidd eit stort dugnadslag utan å fylle eiga lommebok. Det fenger folk noko så enormt, seier Haydom-venen.

Sidan engasjementet blei tent i 1998 har lastebilsjåføren, og kona Åse, før ho døydde i fjor, samla inn over 18 millionar kroner til misjonssjukehuset.

Av bidragsytarar står lokale entreprenørar og næringslivsleiarar så vel som misjonsfolk og sist men ikkje minst landbruksfolk.

– Ikkje tilfeldig, meiner Ingar Kvia.

Vekkja interessa med traktor

Traktorar og maskinar speler nemleg ei sentral rolle, både i innsamlingsarbeidet og på Haydom-hospitalet. Sjukehuset disponerer 5000 mål med dyrka jord. For å få avlingane som gir inntekt trengst skikkeleg utstyr.

Misjonsmann kan få nøkkelrolle hvis Ukraina-krigen gir matkrise i Tanzania

Då Kvia såg den stusslege maskinparken til sjukehuset i 1997 tok han affære.

– Eg tenkte at dette er for gale. Her må noko gjerast.

Han fekk med seg bønder med felles interesse for traktorar og jordbruk og landbrukssenter på landet og planla å stable på beina ein auksjon.

I fyr og flamme kontakta han journalistar og næringslivsleiarar og fortalde om Haydom-prosjektet.

Blei møtt med skepsis frå media

Så kom nedturen.

– Ingen ville sei nei, men alle prøvde å ta motet frå meg, minnast han.

Etter omtalen i Jærbladet begynte likevel ballen å rulle. Stadig fleire store støttespelarar melde seg. Dei andre avisene begynte å skrive, dei også.

Resten er historie.

Den dag i dag går alle pengane til medisinsk utstyr og inntektsbringande tenester ved sjukehuset.

Framleis kjøper Ingar Kvia alt utstyret sjølv.

– Eg har full kontroll på at kvar krone går dit ho skal, fastslår 67-åringen.

I sosiale media deler Kvia heile prosessen frå pengane kjem inn og til dei er omdanna til utstyr i bruk på Haydom. Ofte er det Kvia sjølv som er ute i traktoren på jorda rundt Haydom.

Brukar ingen pengar på administrasjon

Å ta ut løn til seg sjølv eller dei andre Haydom-eldsjelene er uaktuelt.

Tips fra fylkesmannen snudde misjonsarbeid på hodet

Årleg reise og opphald betaler Kvia sjølv.

– Ikkje ei krone går til administrasjon. Det har eg lova gjevarane i avisa, og det skal eg halda. Uansett, seier Kvia.

Kvart år set eldsjela av om lag 70 000 kroner av eiga lommebok til Haydom-hospitalet. pengane går med til å støtte familiar, spontane føremål ved sjukehuset og dessutan reiser og opphald.

Drar til Haydom med NRK

Neste Haydom-tur blir 3. mars.

I løpet av opphaldet blir også eit filmteam knytt til NRK med til misjonssjukehuset.

Planen er mellom anna å dokumentere når auksjonarius, Arvid Mæland, og Kvia overleverer ein ny blodprøvemaskin dei skal kjøpe for auksjonspengane som kom inn førre veke.

– Eg håpar eg klare å halde meg roleg, men det blir ikkje lett. Eg blir så «oppgaldra», innrømmer jærbuen.

«Oppgaldra» kan samanliknast med å vera oppjaga.

– Eg snakkar heile tida og sit aldri i ro. Eg klarer ikkje styra meg, seier Kvia.

Gud som arbeidsgjevar

Han trur det uvanleg store engasjementet skuldast arbeidsgjevaren.

– Gud er min arbeidsgjevar, så eg har «grævlig» problem å slappe av. Han køyrer meg hardt.

– Korleis?

– Eg får ofte nokre input på kven eg skal spørje om hjelp og støtte til arbeidet i Haydom. Når eg kontaktar folk seier dei ofte at dei har venta på meg. Det tek eg som eit teikn på at dette er noko eg skal halda på med til langt inn i alderdommen.

Dersom alt går etter planen blir Ingar Kvia og Haydom-hospitalet å sjå i sesong 2 av underhaldningsdokumentaren «Cowboyen og kongen» på Nrk.

Planlagt publisering er i 2024.