– Bønesvar, seier kristen leiar etter val i India

Sist søndag vart Narendra Modi sett inn som som statsminister for tredje gong i India. Men det skjedde ikkje etter eit valskred som i 2014 og 2019.

Regjeringspartiet BJP vart størst, men er avhengig av støtteparti for å sikre eit knapt fleirtal.

– Bønesvar, seier generalsekretær Vijayesh Lal i Evangelical Fellowship of India til stefanus.no

Han håpar koalisjonsregjeringa vil halde Modi ansvarleg.

Misnøye med fattigdom

73-åringen Modi har vore populær, men også polariserande i India, ifølgje AP.

Han representerer den hindunasjonalistiske hindutva-rørsla.

«Han forsterka dette biletet i talane sine ved å kome med negative merknader om den muslimske minoriteten, som vart oppfatta som eit forsøk på å vende merksemda bort frå mangel på handfaste døme på at løfte er oppfylte».

Det skriv den indiske journalisten Vishal Arora i ein artikkel som er publisert av den amerikanske nettavisa religionunplugged.com.

Arora meiner økonomiske utfordringar, arbeidsløyse og velferdsordningar verkar til å ha skugga for religiøs og nasjonal retorikk som tidlegare har sikra støtte til BJP.

I ein omfattande artikkel viser Reuters dessuten at opposisjonen mobiliserte kastemotstetnader og frykt for endringar i grunnlova for å trekkje veljarar bort frå Modi og BJP.

– Giftig religiøs retorikk

Redaktør Johannes Morken i Stefanusalliansen meiner valresultatet viser at den aggressive kampanjen for å fremje ein hindunasjonalistisk agenda ikkje har hatt suksessen partiet håpa på.

– Vi håper at desse resultata vil vere ei vekking for BJP til å gå bort frå giftig religiøs retorikk og hardhendt behandling av dei som prøver å forsvare menneskerettane i landet. Det er på tide at indiske styresmakter set foten ned for aktivistisk og paramilitær vald mot minoritetar, framfor å gje hat og vald spelerom, seier Morken på stefanus.no.

Mange bøner før valet

Vijayesh Lal håpar at det no vert slutt på lover som trakasserer Indias minoritetar og kristne institusjonar. Med ein sterkare opposisjon vert det vanskelegare for ein BJP-statsminister å få gjennom lover.

– Det har vore bedt mange bøner i indiske kyrkjer før dette valet. Vi opplever dette som eit bønesvar. Dessutan har eit breidt sivilsamfunn jobba døgnet rundt, seier Lal.