Bussen til Hel skal ikkje lenger ha nummer 666

Eit busselskap i Polen har gått med på å endre på rutenummer «666». Bussen går nemleg til Hel.

Det melder Premier Christian News.

«666» er som kjent talet for Dyret i openberringsboka i Bibelen og forbunde med frykt for den vonde sjølv.

– Satanisk

Kristne grupperingar skal i årevis ha aksjonert mot rutenummeret og omtalt det som både satanisk og idiotisk å utstyre nettopp ruta til «helvete» med eit symbol for vondskap.

Namnet på den vakre feriebyen liknar til forveksling på det engelske Hell eller helvete.

– Opp ned

Det polske namnet for helvete er «piekło», og mange lokale reisande har sett på rutenummeret som ein harmlaus spøk. Transportselskapet PKS Gdynia seier kritikken har hagla i ti år og at dei no bøyer av for presset.

I år snur vi opp ned på siste talet, skriv selskapet på Facebook.

Frå 24. juni får ruta nytt nummer, men ikkje så ulikt det gamle:

Heretter er det rute 669 som skal gå til Hel.