«GJEKK ALL INN»: Sum-gründer Roar Voll fekk livet snudd opp ned då Ukraina-krigen braut ut.
Alice Tegle
Då krigen braut ut i Ukraina gjorde forretningsmannen noko han aldri hadde trudd om seg sjølv
– Eg tenkte ikkje. Eg berre handla, fortel Sum-gründer Roar Voll.
Det var om lag ti dagar etter at Ukraina-krigen braut ut. Sivilingeniør og rekneskapsgründer Roar Voll skulle berre ha svogeren og ein overarbeidd kompis på middag.
Kompisen heiter Rune Sæther og er Sentral-Europa-ansvarleg for Ungdom i Oppdrag. Han organiserte det kristne hjelpearbeidet heime frå Noreg. Arbeidsmengda berre vaks. Timane i døgnet strakk ikkje til. Heller ikkje medarbeidarane.
Voll på si side var som alltid travelt opptatt med jobb. Han har vore med og bygd opp fleire selskap i norske byar. Rolla hans i hjelpearbeid hadde derfor vore avgrensa til å vere finansierer og støtteapparat. Å risikere livet var heilt uaktuelt. Trudde han.
