Den største metodistkyrkja i landet kan melde seg ut

Nyleg skreiv Dagen om at Metodistkyrkja sannsynlegvis vil opne for at lokale forsamlingar kan melde seg ut.

Den 18. mars samlar ein av dei øvste organa i den internasjonale organisasjonen seg for å avgjere spørsmålet.

Det skjer etter ein langvarig samlivsdebatt som alt har fått ei rekke sentrale aktørar til å takke for seg.

Difor har vi spurt alle dei 42 metodistkyrkjene i Noreg kva dei vil gjere dersom det blir opna for at dei kan melde seg ut.

Viktig møte

Det er Sentralkonferansen, det nest-øvste nivået i United Methodist Church, som samlar seg 18. mars.

På det ekstraordinære møtet skal ein avgjere om lokale metodistkyrkjer med 2/3 fleirtal i forsamlinga skal få melde seg ut av kyrkjesamfunnet.

Dersom det går gjennom, vil vedtaket sidan bli behandla av Metodistkyrkja i Noreg i juni, som etter alt å dømme vil ta det til etterretning.

Dei vedtok nemleg i fjor at dei «vil legge til rette for at menigheter som ønsker å forlate Metodistkirken […] skal gis mulighet til det på rause betingelser.»

Lokale kyrkjer som ønsker å melde seg ut kan dermed sannsynlegvis starte prosessen alt på seinsommaren i år. Vilkåra for ei slik utmelding er likevel ikkje avgjort endå.

Kan opne for likekjønna vigslar

Metodistkyrkja i Noreg har ikkje vedtatt ein offisiell vigselsliturgi for likekjønna par. Som ein del av United Methodist Church har dei nemleg ikkje mynde til å avgjere lærespørsmål.

Slike saker skal i utgangspunktet bli behandla av det øvste nivået i organisasjonen, Generalkonferansen, som samlar seg først i 2024.

Men når Sentralkonferansen samlar seg i helga, er eit av forslaga å gi mellom anna Metodistkyrkja i Noreg mynde til å vedta ein ny liturgi for vigsel av likekjønna par.

Difor kan det skje allereie til sommaren.

Fleire kjelder Dagen har snakka med meiner trussamfunnet her til lands går mot eit liknande vedtak som Den norske kyrkja fatta i 2017. Alt i fjor sommar bad dei nemleg biskopen om å ikkje sanksjonere prestar og diakonar som skulle komme til å gjennomføre vigslar av likekjønna par.

Centralkirken i Bergen

Ein av dei som vil stemme over kor vidt dei skal melde seg ut eller ei dersom det blir mogleg, er Centralkirken i Bergen. Det er den største metodistkyrkja i landet som i 2022 talte 986 soknebarn. Totalt har Metodistkyrkja i Noreg 11.000 medlemar fordelt på 42 forsamlingar.

Pastoren i Centralkirken, Dag Martin Østevold, har vore tydeleg på kva retning han ønsker at forsamlinga skal ta.

Soknerådet har nemleg bestemt seg for, etter å ha lytta til medlemmane i eit møte med forsamlinga, å ha ein prosess der Centralkirken gjer eit grunnleggande retningsval.

Han har i den samanheng anbefalt forsamlinga å gå ein annan veg inn i framtida enn der Metodistkyrkja i Norge ser ut til å vere på veg, og håpar han får med seg soknebarna sine ut.

Som prest har han likevel ikkje stemmerett i ei slik lokal sak.

Soknerådet har også hatt ei spørjeundersøking om saka.

– Vi må innrømme at resultata tyder på at dette også for den lokale kyrkja er eit kyrkjesplittande spørsmål. Inntrykket er at fleire vil sjå seg rundt etter ei ny kyrkje dersom vi bestemmer oss for noko, seier han og legg til:

– Det gjeld både for dei som er for og mot ein ny samlivsteologi.

Kragerø og Bamble

Harald Olsen er prest i Kragerø og Bamble kyrkjelyd. Dei talte 101 medlemar i 2022.

Dersom det blir mogleg, kjem dei også til å stemme over kor vidt forsamlinga skal melde seg ut, forklarar han til Dagen.

– Det eg ønsker mest, er at metodistkyrkja i Norge skal vende om. Eg håpar vi igjen kan bli ei vekkingsrørsle som legg vekt på kva Gud seier framfor kva samfunnet ønsker. Dersom det ikkje skjer, håpar eg kyrkjelyden vår melder seg ut, seier han.

– Kva gjer du dersom de ikkje får tilstrekkeleg fleirtal (2/3)?

– Som pastor med eit tradisjonelt syn på ekteskapet er det ikkje sannsynleg at eg då blir verande så veldig lenge. Eg ser på denne saka som ein diskusjon om kva som er synd, så på sikt vil eg då trekke meg ut, seier han.

– Korleis ser framtida til Metodistkyrkja i Noreg ut?

– Eg ser to moglege utfall. Enten blir den delt eller så vender ein om, seier han.

Hvittingfoss

Fleire lokale kyrkjer har pågåande prosessar rundt kor vidt dei skal melde seg ut, utan at dei har bestemt seg.

Ein av dei er Metodistkyrkja i Hvittingfoss. Prest Andreas Kjerndal ville ikkje svare på kor vidt dei planlegg å stemme over om ei utmelding eller ei.

I kyrkjelydsbladet deira, publisert på Facebook 6. desember, kan ein likevel lese at dei har ei arbeidsgruppe som ser på «forskjellige alternativer til menighetens framtid når det gjelder kirketilhørighet».

Vidare skriv dei at Metodistkyrkja her til lands er «på vei mot [en] full inkludering av homofili mennesker [sic]» og at dette er krevjande spørsmål for fleire av medlemane deira.

«Skal vi forbli i en slik kirke eller er det bedre for oss å trekke oss ut å finne [sic] en annen tilhørighet?», blir det spurt i kyrkjebladet.

Hammerfest

Metodistkirken i Hammerfest har heller ikkje tatt stilling til ei eventuell utmelding, forklarar prest Kristin Odén Broback til Dagen.

Men dei skriv også om ein pågåande prosess i eit kyrkjeblad publisert i mai 2022.

Dei skal ha hatt fleire møter med kyrkjelyden som gav inntrykk av at det var ulike syn mellom dei, men skriv at «menighetsrådet fortsetter arbeidet med prosessen».

Det inneber ifølge kyrkjebaldet at dei vil sjå på kva alternativ som finst utanfor United Methodist Church, som til dømes det konservative alternativet Global Methodist Church som blei starta i mai 2022.