Denne kyrkja har mista over 6000 forsamlingar

Det stormar i Metodistkyrkja i USA. Etter årevis med debatt om likekjønna vigsel, er fleire konservative forsamlingar lei.

No har rundt éin femtedel av dei lokale kyrkjene forlate trussamfunnet, melder den amerikanske avisa USA Today.

Det skal ifølgje TV-kanalen CBN News utgjere 6182 kyrkjelydar.

Strid om likekjønna vigsel

Det metodistiske trussamfunnet United Methodist Church (UMC), som Metodistkyrkja i Norge er ein del, har sitt tyngdepunkt i USA. På 1960-talet hadde dei rundt 11 millionar medlemar i landet, men er no nede på 6,5 millionar.

Offisielt sett tillèt ikkje kyrkjesamfunnet likekjønna vigsel eller homofile prestar, men temaet har likevel vore årsaka til ein årelang debatt.

Metodistkyrkja har diskutert likekjønna samliv i over 50 år – no kan dei avslutte debatten

Fleire av dei nasjonale kyrkjene har også utfordra forbodet mot likekjønna vigslar.

Seinast førre helg kunne Dagen melde at Metodistkyrkja i Norge slo fast at prestar kan vie kven dei vil. Også likekjønna par.

Det til trass for at dei ikkje har mynde til å endre den offisielle teologien til det internasjonale trussamfunnet.

Dei konservative går

Den årelange striden har ført til eit ras av konservative forsamlingar som vil ut av kyrkjesamfunnet.

Fleire trur nemleg UMC vil endre syn på likekjønna vigsel og homofile prestar når dei samlar seg til det internasjonale «kyrkjemøtet» deira, Generalkonferansen, i 2024.

– Me trur det er svært sannsynleg at dei fleste av dei tradisjonelle avgjerslene me har vedteke dei siste åra vil bli oppheva, sa Jay Therrell til Catholic News Agency nyleg.

Han er president for den metodistiske organisasjonen Wesleyan Covenant Association, og ifølge det kristne mediehuset ein av pådrivarane for rørsla av kyrkjer som melder seg ut.

Vart utsett

Generalkonferansen skulle eigentleg samle seg i 2020 for å behandle eit forslag til korleis kyrkjesamfunnet kunne dele seg opp, men det vart utsett på grunn av pandemien.

Fleire konservative vart difor utolmodige, så i staden for å vente, stifta ei gruppe tradisjonelle metodistar i 2022 eit alternativt metodistisk trussamfunn, kalla Global Methodist Church.

Store delar av dei over 6000 kyrkjene som no har meldt seg ut av UMC har gått inn i dette nye alternativet.

Aktuelt i fleire land

Det er likevel ikkje berre i USA det stormar i Metodistkyrkja.

I slutten av juni meldte nemleg heile den estiske Metodistkyrkja seg også ut av UMC.

Og då Metodistkyrkja i Norge nyleg var samla til sitt nasjonale «kyrkjemøte», opna også dei for at lokale kyrkjelydar kan gjere det same.

Dagen har tidlegare meldt at i alle fall fire kyrkjelydar har drøfta alternativet.