Dokumentar om Räsänen-saka skal kome neste år

I mars i år vart Päivi Räsåanen frifunnen for tre tiltalepunkt om homohets. Dagen har følgt saka til riksdagspolitikaren som tidlegare har vore partileiar for Kristdemokraterna og statsråd.

No er dokumentarfilmen «Free Speech Crime» (Ytringsfridomsbrotsverk) under arbeid. Den skal fortelje historia som starta i 2019 med at Räsänen publiserte ei Twitter-melding som kritiserte at Den lutherske kyrkja i Finland deltok under Helsinki Pride.

Saka som har fått stor internasjonal merksemd. Planen er at filmen skal vere neste haust.

Frå før har den finske rikskringkastaren YLE publisert ein minidokumentar på tolv minutt som er tilgjengeleg med engelsk tekst på Youtube.

Siterte frå Romarbrevet

Filmskaparen Matti Reinikka håper dokumentaren skal vere ei åtvaring for dei som er opptekne av ytrings- og trusfridom.

– Det har vore særleg interesse for saka, til dømes frå Ungarn, Polen og USA, men vi trur verkeleg at interessa er stor over alt, seier han til den nederlandske nyheitsnettsida Christian Network Europe.

I Twitter-meldinga spurde Räsänen korleis kyrkja med Bibelen som læregrunnlag kunne «løfte opp synd og skam som grunnar til stoltheit».

Meldinga var illustrert med eit bilete av Romarbrevet 1,24-27 der likekjønna samliv blir beskrive som eit teikn på at menneska vende seg bort frå Gud og bytta det naturlege mot det unaturlege.

Forsvarte seg med trusfridom

Riksadvokat Raija Toiviainen og påtalemakta meinte meldinga var ei krenking mot homofile som gruppe og framstilte dei som mindreverdige.

I tiltalen vart det også inkludert to andre forhold. Det første var utsegner Räsänen kom med i eit radioprogram på rikskringkastaren YLE seks månader seinare. Det andre var heftet «Til mann og kvinne skapte han dei» som vart publisert i 2004.

Räsänen har konsekvent avvist at ho har krenkt nokon, men berre nytta trus- og ytringsfridomen til å uttrykkje det Bibelen seier.

Ankesak i august

Politikaren vart frifunnen på alle punkt i tingretten i Helsinki i mars. Domstolen meinte at utsegnene var støytande, men ikkje oppfylte kravet til hatefull tale.

Påtalemakta anka dommen.

– Denne dommen må ikkje bli endeleg, sa aktor Anu Mantila til den finske rikskringkastaren YLE i april.

Det er venta at ankesaka vil finne stad i august neste år.

– Saka er ideologisk

Saka er ei av få i Europa der nokon er tiltalt for å ha sitert frå Bibelen.

– Eg meiner den største skandalen med heile rettssaka er at aktor skulda Räsänen for noko ho aldri sa eller skreiv. Heile saka er ideologisk, seier Reinikka.

Han baserer seg på innsamling av pengar for fullføre filmen.