Domstol avviser muslimsk klage på forbod mot klesdrakt

Måndag vart 67 muslimske jenter sendt heim frå skulen i Frankrike. Landet har innført forbod mot bruk av klesdrakta abaya i offentlege skular, og dei 67 nekta å etterkomme oppmodinga om å byte tøy då dei byrja det nye skuleåret.

Straks etter tok muslimske organisasjonar saka til den øvste domstolen som handsamar klager mot statlege styremakter.

– Tilhøyrer ein religion

Torsdag kom avgjerda: Regjeringa sine nye klesreglar blir ståande. Retten avviser at forbodet er diskriminerande eller oppfordrar til hat.

Domstolen meiner plagget fortel at brukaren tilhøyrer ein religion og at det difor er i strid med landets religionsnøytrale skulepolitikk.

Allereie i 2004 innførte landet forbod mot mellom anna kristne krossar, muslimske hijabar og jødiske kalottar i skulekvardagen.

Den aktuelle domstolen, Conseil d'État (statens råd), seier at abayaforbodet er i tråd med fransk lov på dette området.

Det forårsakar ifølgje domstolen ikkje «alvorleg eller openberr ulovleg skade på respekten for personleg liv, religionsfridom, retten til utdanning, barns velvære eller prinsippet om utdanning», skriv mellom andre Al Jazeera.

Advokaten til den muslimske organisasjonen ADM hevda i rettsmøtet at abaya er å oppfatte som eit tradisjonelt plagg, ikkje eit religiøst. Han anklaga også den franske regjeringa for å skåre politiske poeng med forbodet.

Forbod mot burkini

I 2016 innførte Frankrike forbod mot den såkalla burkinien på landets badestrender. Det er eit plagg som dekker mykje større deler av kvinnekroppen enn det vestlege badedrakter gjer.

Den gong vart forbodet klaga inn for den same domstolen, som gav muslimane medhald. I dag er burkini lovleg på franske badestrender.