Eitt år sidan 25 kyrkjer og 90 heimar vart øydelagde. – Frykta sit i

Fredag denne veka er det eitt år sidan 25 kyrkjer og over 90 heimar vart øydelagde av mobb i Jaranwala i Pakistan.

– Mange har flytta tilbake. Dei har ikkje nokon annan stad å bu, seier redaktør Johannes Morken i Stefanusalliansen til Dagen.

Somme scener i åtaket vart filma og formidla av Hindustan Times.

Byggjer opp kyrkjer

Den pakistanske regjerina har finansiert noko av gjenoppbygginga av kyrkjer og heimar.

– Nokre kyrkjer var ferdige til jul. Andre er i ferd med å bli ferdigstilte, opplyser Morken.

Det massive mobbangrepet mot eit heilt kristent samfunn førte til sterke fordømingar heilt til topps i Pakistan. Langt fleire i Pakistan vart merksame på forfølgjinga av kristne og andre minoritetaer. Men lovgivinga er som før, og den lemfeldige rettspraksisen er ikkje endra.

Døydde etter åtak

Sjølv om ingen er blitt avretta for blasfemi i Pakistan, er blasfemilovene eit levande trugsmål mot religiøse minoritetar. Opp gjennom åra er mange som er blitt frikjende i rettssystemet, seinare blitt drepne av mobb.

Seinast i vår skreiv Dagen om Nazir Masih som med naud og neppe overlevde eit åtak i Punjab, men som døydde på sjukehus etter lynsjinga.

– Nokre dagar seinare døydde enkja, truleg etter påkjenninga, seier Morken.

Denne veka melde Stefanusalliansen om to kristne systrer som har fått slike skuldingar kasta mot seg.

– Straffefritt

Ingen vart rapportert drepne under det massive åtaket i Jaranwala fjor. Rettsprosessen mot dei ansvarlege har likevel trekt ut. Arresterte valdsmenn slepp fri mot kausjon.

– Det gjer at frykta sit i hos dei som har vore råka, seier Morken.

Han er oppgitt over at det i praksis er straffefritt å skulde nokon for blasfemi. Dermed kan terskelen for å gjere dette, vere låg.

– Ekstremistane har eit slags nakketak på styresmaktene, seier han.

Saknar meir press

I februar var det val i Pakistan og mykje av styresettet fungerer ikkje.

Morken er glad for at politikarar både frå Noreg og andre land har teke opp blasfemilovene i Pakistan – og ikkje minst misbruken av dei i hatkampanjar mot minoritetar. Men han synest det internasjonale presset er for svakt med tanke på alvoret i situasjonen.

Tidlegare i år kom den pakistanskfødde journalisten Atta Ansari, som er oppvaksen i Noreg, med boka «Blasfemistridens blodige historie». Der teiknar han eit bilete av den pakistanske blasfemikrigen som ei blanding av hekseprosessar og mafiastat, ifølgje Aftenposten.