Eks-husmor Anne Kristin (61) vil på Stortinget for KrF: – Eg har ei anna type erfaring

I august, då det blei klart kva veg det bar for nå avgåtte partileiar Olaug Bollestad, bestemte firebarnsmora frå Stavanger seg.

Ho ville ta opp kampen om andreplassen på stortingslista til Rogaland KrF.

Det er ikkje det at ho ikkje vil stå på topp.

– Men førsteplassen har vore definert frå før.

– No er det mange som snakkar om Jonas og Hadle på topp, og eg respekterer begge to. Dei er unge, dyktige politikarar, som er populære i fylket, seier Anne Kristin Bruns til Dagen.

Ho trur ho kan utfylle KrFU-leiar Hadle Bjuland og eks-ordførar Jonas Sayed, uavhengig av kven som kaprar førsteplassen.

– Eg er ei kvinne på 61 år og har med meg ein anna type erfaring frå familieliv og arbeidsliv blant samfunnets stemmelause. Eg har opplevd å nesten miste eit barn og å vera forelder for barn i ulike livssituasjonar. Eg tvilar ikkje på at Hadle og Jonas kan setje seg inn i korleis det opplevast, men eg har kjent det på kroppen.

Populær i heimfylket

Bruns er firebarnsmor, sosialarbeidar og tidlegare husmor.

Ho har jobba innan rusomsorg, barnevern og ulike deler av sosialarbeidarfeltet, vore tilsett ved Universitetet i Stavanger på barnevernspedagoglinja og vore aktiv i frivillig arbeid.

Sidan 2011 har ho hatt ei rekkje ulike verv og roller i kommune- og fylkespolitikken, der ho mellom anna har vore ein sentral stemme i friskuledebatten.

Førre lokalval hamna ho på topp ti-lista over Stavanger-politikarar med flest stemmetillegg og oppføringar, frå veljarar av andre partilister.

Likevel har KrF kjempa i motbakke med nedslåande meiningsmålingar, både i Rogaland og elles i landet, ikkje minst etter sommarens bråk i toppleiinga til partiet.

Bollestad til Dagen: – Jeg har mistet troen på meg selv

På septembermålinga til Opinion, utført for FriFagbevegelse, fekk KrF berre 2 prosent oppslutning. Dette ville sendt partiet heilt ut av Stortinget, dersom det var stortingsvalg.

– Sårbart

Samtidig denne hausten har det vore ein dragkamp rundt stortingslista til Rogaland KrF.

– Denne nominasjonsprosessen er kanskje noko av det vanskelegaste vi gjer i eit parti, seier Bruns.

– Du skal vegast og målast av ein nominasjonskomite og av alle lokallaga, og du skal på ein måte blottstille deg litt. Det er sårbart.

Bruns står på tredjeplass bak Siri Bloch Lindtveit i den fyrste innstillinga frå nominasjonskomiteen.

Lindtveit markerte seg på dei konservative bedehusforeiningane si side i den mykje omtalte Klepp-saka.

Siri (KrF) kjempa for å behalde kulturstøtta til kristne i Klepp. 13. mars var siste sjanse til å få dei andre politikarene med

Ho leiar i dag Rogaland KrF.

Det er utanfor komfortsona til Bruns å ta opp kampen mot det ho meiner er ein dyktig kollega.

Men ho gjer det likevel.

– Kanskje det som skil oss er at eg er meir kjent i fylket, både i politikken og i kristent arbeid, seier ho.

Bruns har mellom anna vore med å starta IMI-kyrkja sitt kyrkjelydsnettverk Agenda 1 saman med mannen, Steve.

Dei har besøkt mange forsamlingar og bedehus i store delar av Rogaland.

Får konkurranse frå Truls

61-åringen ser for seg fleire moglegheiter til å påverke med ein andreplass.

– Vi kan få inn ein, kanskje to på Stortinget, viss vi gjer ein veldig god valkamp og val. Og om vi kjem i regjering kan det bli ein statsrådpost, seier ho.

9. oktober kom ei etterlengta gladmelding for Bruns og partiet hennar.

På målinga Opinion har utført for FriFagbevegelse og Dagsavisen, går KrF fram med heile 2,3 prosentpoeng, frå septembermålinga, til ei oppslutning 4,3 prosent.

Men mykje kan skje fram mot valet.

I Rogaland har den ferske Konservativt-politikaren Truls Olufsen Mehus meld seg på i kampen om konservative stemmer.

Truls Olufsen-Mehus går for stortingsplass fra Rogaland

– Kva får deg til å tru at det er KrF som vinnar den kampen?

– Fordi eg trur på det programmet som vi har. Eg trur på mange av dei folka som jobbar i ulike kommunar og fylkeskommunar og påverkar politikken. Det trur eg mange veljarar ser og, og så har vi røter i politikken i mange år, legg ho til.

Optimistisk etter leiarskifte

Anne Kristin Bruns ser ikkje for seg at andre parti vil ta KrF si rolle i politikken.

– På enkelte debattar i Arendalsveka såg eg tydeleg at hadde ikkje KrF vore der, hadde mellom anna menneskeverd og frivilligheit ikkje vore løfta fram på same måten.

Ho er optimistisk og trekk fram Dag Inge Ulstein som ein av årsakene til det.

– Då Dag Inge tok på seg ansvaret for å leie partiet framover såg vi at det var ein ganske solid partiorganisasjon som stilte seg bak han, og då begynte eg å sjå positivt på framtida. Han vil bli ein god leiar, slik eg ser det, og gler meg til å jobbe saman på Krf-laget.