Elev på kristen skule fekk høgast mogleg snitt
Oskar Ramsli Lomeland (18) inkluderte trua aktivt i skulearbeidet allereie frå 1. klasse på vidaregåande.
Publisert
Sist oppdatert
Den tidlegare eleven har nyleg fullført tre år på Tryggheim vidaregåande skule i Rogaland.
På vitnemålet fekk han svimlande 6,4 i snittkarakter – det høgaste snittet ein vgs-elev kan få.
Annonse
Stavanger Aftenblad omtalte saka først.
Til Dagen seier Lomeland at han alltid har følgt med i timen, men at han nok ikkje har vore smartast i klassen.
– Det handlar om leggje ned ein innsats, for slik kan ein gjere det så godt ein kan ut frå eigne føresetnader.
Det siste året har han sagt ein del nei til å finna på ting. Venene fortsette likevel med å invitere han med.
– Det motiverte meg til å gjere skulearbeidet meir effektivt.
På tross av at mykje tid har gått til skulearbeid, opplever han å ha fått med seg den sosiale biten. Sidan han har budd på internatet skjedde mykje av det sosiale rundt måltida.
«Jabes bøn»
I slutten av 7. klasse bad han «Jabes Bønn» kvar kveld før han la seg.
Annonse
– Eg trur det er kraft i opne bøner som «Jabes Bøn» der ein ikkje ber om det ein sjølv ønskjer i livet, men det Gud ønskjer.
Kort tid etter han begynte å be, dukka Kongstun Kristne Friskule opp. Lomeland verdsette skulen sine verdiar og trong eit miljøskifte. Han opplevde det som eit bønesvar.
I 8. klasse vart Lomeland og tre andre dei første elevane ved skulen.
Karakterane hans auka med ein halv karakter, noko han trur hadde med den høge lærartettleiken på skulen å gjere.
Han beskriv eit godt læringsmiljø og at dei andre elevane sin prestasjon gjorde det lettare for han å gjere det bra.
Læringsmiljøet
Lomeland seier det same om læringsmiljøet på Tryggheim vgs. Det har vore viktig og godt for han å ha folk rundt som ønska å gjere det bra, utan at ein behøvde å samanlikne seg.
– Om det betydde karakteren fire eller seks så var det akseptert i vennegjengen. Det var ikkje slik at alle sikta på seksarar.
Annonse
Han synest det er fint at alle er forskjellige. Kvar og ein kan prestera godt ut frå eige utgangspunkt.
Han set også pris på at lærarane tok seg tid sjølv om dei ikkje måtte.
– Eg kunne komme med ein tekst til norsklæraren og få retting, tips og triks, noko som hjelpte meg mykje i arbeidet fram mot vurderingane.
Bad før kvar prøve
I slutten av første klasse bestemte Lomeland seg for å be før kvar prøve.
– Eg bad «Kjære Gud. Eg ber om å få den karakteren du vil. Eg legg det i dine hender.»
– Kvifor eg skulle få akkurat 6,4 i snitt, veit eg ikkje.
Lomeland har lyst til å studere medisin, noko som har vore draumen sidan 10. trinn då han fekk 5,9 i snitt. Med dei karakterane kunne han bli kva han ville.
Annonse
Særleg på vg3 bestemte han seg for å verkeleg satse.
– Eg tenkte det var ingen ting å tape. Det verste som kunne skje var at eg ikkje fekk seksar i alt.
Lomeland seier at han kjenner det skal bli godt med eit år til å tenkje på litt andre ting. Til hausten skal han nemleg gå musikklinja på Bibelskulen i Grimstad. Etterpå ser han for seg å starte på medisinstudiet.
