Familiefaren ble kristen på leir

Sommaren har for alvor kome til Sørlandet, og sola skin på himmelen når IMI-kirken in Stavanger arrangerer sin sommarfestival på Bibelskolen i Grimstad. Området er stappa av campingvogner og telt, og det kryr av folk frå alle kantar.

Det er ein smørblid hovudpastor som møter oss. Egil Elling Ellingsen fortel om rekorddeltaking i år, og at dei i løpet av fem år har vakse seg så store at dei sprengjer kapasiteten på området.

– Vi starta for fem år sidan og hadde ei kjempegod oppleving, og sidan har det berre utvikla seg. Det har blitt fleire og fleire folk, og i år er det rekord med cirka 1200 deltakarar frå heile landet, seier han.

Sidan oppstarten av festivalen i 2015 har festivalen auka med 400 deltakarar. Ellingsen trur at det handlar om ein open profil.

– Eg føler ikkje at vi har gjort så mykje anna enn berre å begynne. Eg trur at dei som har vore her har hatt ei positiv oppleving, og har teke det med seg til sine. Så har vi vore veldig opptekne av at sjølv om det er IMI-kirken som arrangerer, så er det ikkje ein festival berre for IMI-folk. Den er for alle, seier ­pastoren.

Ei større rørlse

Ellingsen vert med på ein runde rundt i campen for å vise fram festivalområdet. Han stoppar opp ved familiane Simonnes og Lapierre som nyleg har flytta frå Stavanger til Arendal for å plante ei ny IMI-kyrkje der.

Dei seier at det er stort å få kome til Åpen Himmel og treffe igjen vener frå Stavanger.

– Det beste med å vere på Åpen Himmel er å vere med storfamilien, og sjå at vi er ein del av ei større rørsle. Det er viktig for oss å vise borna at vi er ein del av noko større enn den vesle kyrkja vi har i Arendal, seier Alexander Lapierre.

I tillegg til den nyplanta kyrkja i Arendal har IMI kyrkjer i Stavanger, Sandnes, Tananger og Oslo.

Liv vert forandra

Ellingsen seier at dei kvart år høyrer om folk som har fått liva sine forandra under Åpen Himmel.

– Alt frå at ein tek nye val i livet, til konkrete helbredingar eller at ein har fått ord frå Gud som har hatt betydning for dei. Det er fantastisk å høyre at menneske har fått eit betre liv etter å ha vore på Åpen Himmel, seier han.

Ellingsen fortel om ein person som vart frelst på Åpen Himmel for nokre år sidan og set kursen mot teltet kor han bur.

Frelst under Åpen Himmel

Stefan Høysæter Svendsen flytta frå Sørreisa i Troms til Stavanger for å studere. Der møtte han Lillian som gjekk i IMI-kirken. Stefan var tydeleg på at han ikkje var kristen sjølv, men vart med i IMI-kirken for å vere med henne.

– Eg var litt spent første gongen, men eg vart møtt med eit smil og fekk ei kjensla av at det var kjekt at eg var der. Det var ikkje noko problem at eg ikkje var kristen, fortel han.

Dei gifta seg, fekk ein son, og heldt fram med å gå i kyrkja. Stefan var også med som medarbeidar i barnearbeidet, men var framleis ikkje kristen.

– Eg fór jo til og med på gudsteneste sjølv om kona var på jobb. Det var ein plass eg verkeleg ynskja å vere. Det einaste eg ikkje ville, var å gå til nattverd.

Frå ikkje-truande til trusopplærar

I 2016 reiste dei på Åpen Himmel for første gong. Dei reiste saman med familie og vener, og under ei gudsteneste på festivalen fekk han det for seg at dei for første gong skulle gå til nattverd som familie.

– Medan vi stod i køa så kjende eg ei vanvittig god kjensle. Det var som ei kappe som vart lagt over oss som familie, og då greidde eg ikkje å bortforklare ting lenger. Eg hadde ikkje noko eg skulle ha sagt. Det vart så naturleg for meg at frå no av skal eg vere ein kristen, fortel Stefan.

I ettertid har dei framleis vore aktive i IMI-kirken i Stavanger, men til hausten startar ei ny epoke i liva deira. Stefan har fått jobb som trusopplæringsleiar i Fusa kyrkje i Hordaland.

Ynskjer å vekse vidare

Ellingsen trur at festivalen har potensiale til å vekse enda meir, men seier at dei ikkje stressar med vekst.

– Vi håpar å fortsetje å vekse. Det er ikkje noko mål å bli størst mogleg, men vi vil gjerne vekse ­vidare og ser på korleis vi kan gjere­ det best mogleg her på bibel­skulen, seier han.

Familier hadde ikke råd til å reise på ferie – da tok menigheten affære

Føler seg trygge i «Lille Grimstad»