Folkehøgskule har gitt meirsmak på jobb

Det summar i stemmer og klirrar i fat og glas. Elevar og personale på Sjøholt folkehøgskole, som ligg langs vegen knapt halvvegs frå Ålesund til Molde, er samla til lunsj.

I bakken framfor vindauga er arbeidet med dei to nye internata i sluttfasen.

– Vi håper dei skal vere ferdigstilte i løpet av februar. Hovudbygningen heiter «Slottet», og så skal internata heite «Kongen» og «Dronninga», seier rådgivar og lærar Per Gunnar Hamnøy.

Omfattande oppgradering

Dei knapt 30 elevane bryt opp og finn vegen til klasserom og gymsal i den totalrenoverte skulebygningen.

Dei siste månadene har Dagen fleire gonger skrive om kostnadssprekken på folkehøgskolen som er eigd av Indremisjonsforbundet. Organisasjonen må ta ansvar for 39 millionar kroner meir enn først planlagt.

– Korleis har merksemda om økonomien prega oppstarten?

– Her på huset pregar det ikkje andre enn meg, seier rektor Lars Johan Klokk med eit smil.

Han poengterer at noko av forklaringa på prislappen er at ein undervegs har gått for eit meir omfattande oppgraderingsprosjekt, og gjennomført på kortare tid. Dermed meiner han at prosjektet ikkje berre har fått ein større kostnad, men også ein større verdi.

Sat berre heime

På eit klasserom i den øvste etasjen sit elevane på den største linja, gaming, opptekne med kvar sin datamaskin.

Lenger inn i gangen er linja arbeidslivsfag, der Hamnøy underviser, klare for ein ny time.

– Eg sat berre heime og gjorde ikkje noko, seier Even Birkebekk (20) frå Steinkjær om tida før han starta på folkehøgskulen på Sunnmøre.

Anton Gunnerød (18) frå Tønsberg fortel at han ikkje fekk lærlingplass og trengde noko anna å gjere.

– Eg trengde berre eit år for meg sjølv, seier Miriam Valderhaug (16) frå Valderøy utanfor Ålesund.

Bestemor hennar var elev på Sjøholt då dette var husmorskule og har vore på besøk for å fortelje elevane om den tida.

– Ein vert veldig godt kjend med alle som går her, seier Miriam.

Klassekameratane er samde i at nye venskap har vore noko av det beste med å kome hit.

– Det er bra at vi ikkje får karakterar og at alle er på same nivå, seier Even og får støtte frå dei to andre.

Klar for arbeidslivet

Ein viktig visjon med skulen er å gi eit tilbod til skuletrøytte ungdommar som er ferdige med ungdomsskulen. På arbeidslivslinja har dei arbeidspraksis i ei verksemd eller på ein gard ein dag i veka.

– Eg har prøvd mykje forskjellig arbeid saman med vaktmeisteren, fortel Even.

Han synest det har vore spennande og lærerikt.

– Har det gjort noko med kva du vil vidare?

– Eg vil ut i arbeid, seier han.

Anton har hatt planar om å arbeide i anleggsbransjen så lenge han kan hugse. Framleis er målet å køyre gravemaskin.

– Eg skal studere, seier Miriam.

Maskulint fleirtal

Gutane er i fleirtal på skulen i år.

– Ei årsak kan vere at gutar er mest slitne etter ungdomsskulen, seier Per Gunnar Hamnøy.

Han viser veg gjennom dei nyoppussa gangane og opphaldsromma, samt internata som elevane skal få ta i bruk så snart dei er klar.

På ei av dørene heng eit ark med passord til det trådlause nettet: «HerSkalJegOppforeMeg».

Booka til 2031

Den tredje linja som allereie er i drift, er multisport. Neste skuleår er håpet at mellom anna toglinja «På skinner», ei fotballinje og kreativ design skal kome i drift, samt ei linje med butrening for elevar med spesielle behov.

Når dette semesteret er over, er skulen også klar til å opne sommarhotellet som skal vere i drift når der ikkje er elevar. Bookingar til bryllaup og konfirmasjon er det allereie blitt ein del av.

– Den som ligg lengst fram i tid, er i 2031, forklarer Hamnøy nøgd.

Håper på 50-60 elevar

Rektor Lars Johan Klokk synest oppstarten har gått bra.

– Vi har fått 30 elevar og har blikket på elevane. Det er ein kjempeflott elevflokk som vi har eit godt forhold til og kan møte kvar dag på ein god måte, seier han.

Personalet er han også godt nøgd med.

– Korleis ligg det an med søknader til neste år?

– Vi ser ein stor framgang frå i fjor. Det er noko anna å sende elevar til ein skule som vi trur skal vere ferdig til skulestart, enn til ein skule som har fasilitetar og personale og er klar til å ta imot, seier han.

Målet er at det skal bli 50-60 elevar neste skuleår, men han trur det er sunt om skulen ikkje vert full allereie til hausten.

– Vi vil ikkje vekse for fort, understrekar han.

– Korleis ser du på utsiktene for økonomien?

– Får vi elevane vi skal ha, skal dette gå greitt for skulen, seier Klokk.

Samarbeid med lokalsamfunnet

Samstundes legg han ikkje skjul på at eigaren Indremisjonsforbundet har teke på seg forpliktingar. Men han håper ein finn løysingar på dette og at skuleanlegget kan bli ein ressurs for organisasjonen.

Rektoren synest skulen har fått ein god inngang i lokalsamfunnet.

– Næringslivet har vore kjempeimøtekomande. Det er stort behov for arbeidsfolk i landet vårt, seier han.

Han håper skulen skal medverke til å setje fleire i stand til å kome i jobb.