Fordøming og forbøn
Kristne leiarar står i kø for å fordøme åtaket på Kongressen. Einskilde ber framleis om at Donald Trump skal halde fram som president.
Sjokket etter storminga av Kongressbygningen i Washington D. C. på onsdag fekk eit breitt spekter av kristne leiarar til å oppmode amerikanarar til å be og søkje einskap.
– Å trasse og gå til åtak på politiet er ei synd enten det er gjort av Antifa eller sinte republikanarar, skreiv Robert Jeffress på Twitter.
Annonse
Først ute
Pastoren i First Baptist Dallas er ein av dei kristne leiarane som var først ute med å støtte Trump og har stått last og brast med presidenten. Mellom anna var han invitert då Trump opna den nye amerikanske ambassaden i Jerusalem i 2018.
Antifa er ei laust samansett gruppering av ytterleggåande organisasjonar på den politiske venstresida som Trump har karakterisert som ei terrorgruppe.
Evangelist Franklin Graham spekulerte også på at det «mest sannsynleg var antifa». Han har vore ein annan trufast Trump-støttespelar og deltok som forbedar både under innsetjinga i 2017 og valkampen i fjor haust. Han meiner likevel både republikanarar og demokratar ber ansvar for problema USA står overfor.
«Splittinga i landet vårt er større enn nokon gong sidan borgarkrigan. Eg ber krsitne om å sameina hjarta våre i bøn for påtroppande president Joe Biden og påtroppande visepresident Kamala Harris og for leiarskapen i begge partia», skriv Graham på Twitter.
Tidlegare har Graham uttrykt at han festar lit til Trumps påstandar om valjuks.
Digitalt bønemøte
Dei mest ihuga støttespelarane i krinsen av kristne leiarar rundt Trump arrangerte så seint som onsdag kveld, etter storminga i den amerikanske hovudstaden, digitalt bønemøte.
Annonse
30 slike er blitt arrangert sidan november. Forfattar og radiovert Eric Metaxas har vore vert for møta. Sidan november har han spådd at Trump kjem til å bli innsett trass i at alt har peika på Biden.
Tidlegare kongresskvinne Michele Bachmann, som til liks med Metaxas har vore talar på Oslo Symposium, deltok på bønemøtet. Ho fortalte at ho var på Capitol då åtaket fann stad. Ho meinte konservative kristne kongressmedlemer hadde vendt seg mot presidenten.
– Medlemene eg var saman med i kveld, er sinte på president Trump i kveld, sa Bachmann ifølgje Religion News Service.
– Dei spyr ut det falske narrativet, heldt ho fram.
Bachmann vart intervjua av Dagen då ho var i Bergen i 2019. Med tanke på politiske resultat var ho «ekstremt stolt av det Donald Trump har gjort».
Deltakarane på bønemøtet denne veka innsåg at sjansane for at Trump skulle vinne, no er små. Men Metaxas ber framleis om eit mirakel.
– Gud har ein plan, forsikra han før han innleie bøna.
Symbol på raseskilje
Annonse
Dei fleste kristne leiarane som har ytra seg etter dramatikken som utspelte seg på onsdag, har nøya seg med å oppmode til å kome saman i bøn og gjensidig forståing.
«Væpna brot på tryggleiken på Capitol under konføderasjonsflagget er anarki, uamerikansk, kriminelt forræderi og heimeavla terrorisme. President Trump må klart fortelje støttespelarane sine: Vi tapte. Gå heim no», skreiv megakyrkjepastor Rick Warren på Twitter på onsdag.
Konførerasjonens stridsfane vert av mange oppfatta som eit symbol på raseskilje i sørstatane.
Fleire observatørar reagerte på at det mellom norrøne og «kvit makt»-symbol også var kristne symbol å sjå under åtaket på Kongressbygningen, mellom anna eit gult skilt med påskrifta «Jesus saves».
– Kuppforsøk
Den leiande episkopale biskopen Michael Curry, som vart kjend for heile verda då han vigde prins Harry og Meghan Markle i London i 2018, kallar hendingane i Washington djupt urovekkande.
– Vi meiner handlingane til væpna demonstrantar representerer eit kuppforsøk, seier han ifølgje Religion News Service.
To kristne leiarar som har vore assosierte med Trump, Samuel Rodriguez i National Hispanic Leadership Conference og Johnnie Moore i The Congress of Christian Leaders, seier dei er letta over at både Biden og Trump bad demonstrantane gå heim og tok til orde for å halde fred,
Annonse
«Vi oppmodar alle amerikanarar - demokratar og republikanarar - til å gå saman i bøn for nasjonen vår slik at rettferd, kjærleik og truskap vil rettleie hjartet i nasjonen vår», skriv dei.
Kristne symbol
Den kvinnelege sørstatsbaptistiske bibellæraren Beth Moore har vore sterkt kritisk til kristen Trump-støtte. Ho reagerte på at kristne symbol var å sjå under tumultane i Washington.
– Dei handlar kanskje i namnet til ein annan Jesus, men det er ikkje Jesus frå evangelia, seier ho ifølgje Religion News Service.
Fleire kristne leiarar gir også Trump ansvar for det som skjedde.
Ed Stetzer, som leiar Billy Graham-senteret ved Wheaton College, trur dei komande månadene vil vise kva skade som er skjedd.
«Meir enn den politiske situasjonen fryktar eg ein skade på vitnemålet vårt som (kvite) evangelikale som er blitt så sterkt forbundne med denne presidenten, skriv Stetzer i Christianity Today.
Rundt åtte av kvite evangelikale som røysta ved vala både i 2016 og 2020, støtta Donald Trump, ifølgje valdagsmålingar.
Annonse
Hol klang
Historieprofessor John Fea, som har vore intervjua i Dagen om boka «Believe Me: The Evangelical Road to Donald Trump», meiner det har ein hol klang når evangelikale fordømer valden.
«Det er inga erkjenning av at desse mennene og kvinnene gav Donald Trump makt eller oppmoda etterfølgjarane sine til å røyste på han», skriv Fea på bloggen sin. Han er tilsett ved Messiah University.
«Det ville vere best om desse hoffevangelikale berre var stille. Eller endå betre dersom dei kunne vedgå at dei er medskuldige i opprører og den politiske terrorismen som fann stad i Washington D. C. i dag og omvende seg».
