Forskar fann ukjent fragment frå Det nye testamentet

Nyleg fann ein forskar ved Det Austerrikske Vitskapsakademiet eit nytt fragment frå evangeliet etter Matteus.

I sentrum av oppdaginga står ei moderne teknologisk løysing.

– Funnet gir eit unikt innblikk i den tidlege, historiske fasen der evangelia vart overlevert, seier forskingsinstitusjonen på sine heimesider.

Ny teknologi og gammal tekst

I mellomalderen var pergament ei mangelvare. Difor var det vanleg å viske ut gammal tekst for å bruke materialet om igjen.

Først i vår tid har forskarar fått tilgang til dei utviska tekstane gjennom det ein kallar ultrafiolett fotografering.

Teksten var antatt tapt i meir enn 1000 år – så dukka den opp i eit kloster

Det var denne teknologien Grigory Kessel tok i bruk då han nyleg fann eit pergament der evangeliet etter Matteus kapittel 11, vers 30, til kapittel 12, vers 26 hadde blitt viska ut.

Claudia Rapp, som er leiar av instituttet for mellomalderforsking ved institusjonen Kessel jobbar ved, er imponert over sin kollega.

– Denne oppdaginga viser kor produktivt og viktig samarbeidet mellom moderne, digital vitskap og vanleg forsking på manuskript frå mellomalderen er, seier ho til institusjonen.

Syrisk kristendom

Syrisk kristendom har lange røter. Ifølge tradisjonen går den tilbake til den nytestamentlege forsamlinga i Antiokia. Allereie på nytestamentleg tid, vart omgrepet «kristen» tatt i bruk der, slik forfattaren av Apostelgjerningane skriv.

Fragmentet som Kessel har oppdaga er frå det sjette hundreåret, men er ein kopi av ei syrisk omsetting frå det tredje hundreåret.

Kessel forklarar til Det Austerrikske Vitskapsakademiet at oppdaginga hans er det fjerde kjente pergamentet som vitnar om den 1750 år gamle omsettinga. Difor gir det ei unik innsikt i korleis dei tidlege kristne omsette og overleverte nytestamentlege tekstar.

Ein ser til dømes at den syriske omsettinga av evangeliet etter Matteus enkelte stader skil frå den originale greske grunnteksten.

I kapittel 12, vers 1, seier til dømes grunnteksten at: «På den tid tok Jesus vegen langsmed kornåkrane på sabbaten. Læresveinane hans var svoltne og tok til å riva av aks og eta», mens den syriske omsettinga utdjupar med at disiplane «begynte å plukke aksa, gni dei i hendene og ete dei.»

Kessel presenterer funna sine i det akademiske tidsskriftet New Testament Studies.