Første skuledag i Frankrike: 67 muslimske jenter sendt heim

I Frankrike har skuleelevar ikkje lenger lov å bruke det islamske klesplagget abaya.

Styremaktene meiner drakta er eit brot på landet sine sekulære skulelover, og nasjonale retningsliner vart innført då skulane måndag opna etter sommarferien.

Nekta å skifte

Ei rekke mediehus melder at 67 jenter vart sende heim på første skuledag. Dei skal ha møtt opp i abaya og nekta å skifte tøy.

Den franske undervisningsministeren Gabriel Attal opplyser at nær 300 franske jenter møtte opp i den forbodne drakta og at dei fleste gjekk med på å skifta klede.

Forbod mot religiøse symbol

Frankrike har i snart 20 år hatt forbod mot bruk av religiøse symbol i offentlege skular. Muslimske jenter kan ikkje gå med hijab, kristne kan ikkje bere kross og jødiske jenter og gutar får ikkje gå med kalott.

Klesplagget abaya har vore ei gråsone, og først i slutten av august i år kom regjeringa med instruksen som no er sett i verk.

Regjeringa får støtte på den politiske høgrefløya i Frankrike, medan venstresida og einskilde forskarar er kritiske.

Nokre hevdar at abaya handlar meir om identitet og mote enn om religion.

Vurderer skuleuniformer

Skuleministeren Attal seier til tv-stasjonen BFM at det kan bli aktuelt å innføre uniformer i skulen eller komme med ytterlegare påkledingsreglar.

– Eg trur ikkje at skuleuniform er ei mirakelløysing, som løyser alle problem med sjikane, sosial ulikskap og sekularisme, seier han til BFM ifølgje Reuters.

Men han vil gjerne «eksperimentere» for å få i gang ein debatt.

Ifølgje BBC vil familiane til dei 67 jentene bli kontakta. Dersom dialogen ikkje fører fram, vil jentene bli ekskludert frå skulen.

12 millionar jenter og gutar har starta på eit nytt skuleår i Frankrike. Sett i høve til dette talet meiner regjeringa at forbodet verkar godt.

President Emmanuel Macron seier det er ein liten minoritet i Frankrike som «kaprar ein religion og utfordrar republikken og sekualarismen.»

Då Macron måndag forsvarte dei nye reglane, minna han om drapet på læraren Samuel Paty for tre år sidan. Han blei myrda etter å ha synt karikaturar av profeten Muhammed i ein samfunnsfagtime.

Lærer ved kristen skole knivdrept av elev

Vil ha forbod prøvd for retten

– Vi kan ikkje handle som om terroråtaket, drapet på Samuel Paty, ikkje har funne stad, seier Macron til YouTube-kanalen HugoDecrypte, ifølgje The Guardian.

Men siste ord er ikkje sagt: Frankrikes råd for muslimsk tru (CFCM) tek abaya-forbodet for domstolen som handsamar klager mot statlege styremakter. Dei meiner forbodet aukar risikoen for diskriminering.