Fredrik (19) vegrer seg for å bli fjerdegenerasjons metodistprest

Denne helga kan Metodistkyrkja ta sitt første steg mot ein ny samlivsteologi.

Det har fått fleire konservative til å reagere.

Ein av dei er nitten år gamle Fredrik Johan Aandstad Olsen, som rettar kritikk mot kyrkjesamfunnet sitt i eit debattinnlegg i Dagen.

John Wesley: «Ei død sekt»

Olsen er for tida i militæret, men har vakse opp i og tilhøyrer Kragerø metodistkyrkje.

I innlegget siterer tenåringen grunnleggaren av metodismen, John Wesley, som på 1700-talet sa at han ikkje var bekymra for at metodismen skulle forsvinne. Det han derimot var bekymra for, var om rørsla ville ende opp som «ei død sekt».

Samlivssyn skapar uro i Metodistkyrkja – no kan fleire forsamlingar melde seg ut

Olsen meiner Wesley ser ut til å ha talt profetisk i lys av den teologiske utviklinga i Metodistkyrkja dei seinare åra.

– Eg trur metodistkyrkja no har blitt ei død sekt, slik Wesley åtvara mot. Med den liberale utviklinga vår, trur eg vi vil bli mindre og mindre før vi til slutt forsvinn heilt, seier han til Dagen.

– Kvifor trur du liberalisering vil føre til nedgang?

– Eg føler ikkje vi har noka retning, fordi kyrkja har gått bort frå Bibelens tradisjonelle lære i samlivsspørsmålet, seier han.

Reagerer på biskop

Nyleg kunne Dagen melde at Metodistkyrkja sin biskop i Norden og Baltikum, Christian Alsted, gjekk hardt ut mot ein tidlegare kollega. Alsted skulda den tidlegare biskopen av Texas, Scott J. Jones, for å ha fått halvparten av kyrkjene han var hyrde for til å melde seg ut.

Olsen meiner Alsted gjekk for langt, og at skuldingane er tvilsame, sjølv om det Jones blir skulda for ikkje ville vore prinsipielt problematisk, ifølge tenåringen.

Biskop om kollega som forlèt Metodistkyrkja: – Forræderi

«Hva er galt i å lede medlemmer inn i en kirke […] som har ambisjoner og planer om å ta tilbake læren, disiplinen og ånden som var hos de første metodistene», spør han.

Vi har vore i kontakt med Christian Alsted. Han seier at han «ikkje ønsker å gå i dialog med ungdommar i kyrkja gjennom media.»

Usikker framtid

Olsen har fleire generasjonar med metodistpastorar bak seg.

Han er tippoldebarn av ein metodistisk lekpredikant. I tillegg er han oldebarn, barnebarn og son av metodistpastorar.

Han fryktar forsamlingar kan bli hindra frå å melde seg ut av Metodistkyrkja

Sjølv har han tenkt å bli prest, men utviklinga i Metodistkyrkja gjer han usikker.

– Eg synest oppriktig det er utruleg vanskeleg. Eg kjenner på eit verkeleg kall til å forkynne og tene og har eit hjarte for kyrkja mi, men eg kan ikkje sjå ei framtid i den, seier han.

– Det skal vere plass for alle

Martin Vestøl er leiar for hovudstyret i Metodistkyrkja Noreg. Det vil seie at han er den øvste, leke representanten for trussamfunnet her til lands.

Han håpar det vil vere plass til Olsen sitt syn i Metodistkyrkja.

– Det skal vi gjere alt vi kan for at det skal vere. Fredrik har mykje å tilføre kyrkja vår, men det gjeld også dei med eit anna syn på samlivet, seier han.

Vestøl understrekar at han er glad for at unge metodistar som Olsen engasjerer seg, og at meiningsmangfaldet i kyrkjesamfunnet også er å sjå i ungdomsarbeidet deira.

Den største metodistkyrkja i landet kan melde seg ut

– Kva tenker du om kritikken Olsen rettar mot Metodistkyrkja?

– Eg er glad for at han skriv og er ærleg om det han meiner, og eg er glad for ein open debatt. Han er krass og tydeleg på kvar han kjem ifrå og kvar han vil, seier han.

– Er det rett å kalle Metodistkyrkja ei død sekt?

– Det er eit berettiga spørsmål han stiller, men for meg er ikkje samlivssyn eit splittande spørsmål. Eg kjenner gode kristne på begge sider.

Vestøl understrekar at han samtidig har respekt for dei som ikkje kan leve med to syn på samlivet.

– Eg ønsker likevel å lage plass til slike som Fredrik, seier han.

Fredrik Johan Aandstad Olsen er nevøen til Martin Vestøl.