Halvor Nordhaug sluttar i november, «kven som helst» kan foreslå etterfølgjaren

Det pågår for tida eit stort skifte av biskopar i Den norske kyrkja. Søndag fekk Borg ny toppleiar då Kari Mangrud Alvsvåg (51) blei vigsla i Fredrikstad domkyrkje. Frå før er det kjend at Hamar-bispen Solveig Fiske (69) går av til hausten.

Det gjer også Halvor Nordhaug (69) i Bjørgvin. Avskilsgudstenesta hans blir 20. november.

Ber om forslag

Bjørgvin bispedøme innleier i desse dagar prosessen som skal føre fram til valet av Nordhaug sin etterfølgjar.

«Kva eigenskapar meiner du at ein biskop burde ha, og har du forslag på aktuelle kandidatar? Innan 1. november 2022 kan du svare på dette ved å klikke her eller på ein av boksane nedst på denne sida. Det er anonymt kven som kjem med forslag», heiter dei i pressemelding frå Bjørgvin bispedømekontor onsdag kveld.

«Kven som helst» kan kome med forslag, heiter det vidare. Det skjer på eit eige skjema, som er lagt ut på bispedømet sine nettsider.

Deretter har bispedømerådet frist til 18. november med å nominere fem kandidatar, før det blir gitt høve til såkalla supplerande nominasjon.

To veker før jul blir kandidatane presentert. Etter ein avstemmingsrunde på ulike kyrkjelege nivå blir ny biskop tilsett i byrjinga av februar 2023.

Planen er at de nye bispen bli innsett i ei vigslingsgudsteneste i Bergen domkyrkje 16. april neste år.

92 namn i Hamar

Det er vanleg at den første lista tel mange namn. Hamar har nettopp offentleggjert 92 forslag på prestar folk meiner bør etterfølgje Solveig Fiske.

Slik blir du biskop i Den norske kirke

Ein oversikt presentert i Dagen viser at dei sitjande bispane var i snitt litt over 55 år då dei bli vigsla.

Det er i dag fleirtal av kvinner i Den norske kyrkja sitt bispekollegium. Av dei siste seks utnemningane er fire kvinner og to menn.