PROREKTOR: Amund Langøy blir prorektor for utdanning ved NLA Høgskolen dei neste to åra. Foto: NLA
Han er ny prorektor ved NLA
Amund Langøy går inn i rolla som prorektor for utdanning ved NLA Høgskolen, som nyleg fekk avslag på søknaden sin om å få tilby full presteutdanning.
– Langøy vil ha eit heilskapleg ansvar for utdanningsverksemda ved NLA, og eit spesielt ansvar for leiinga av arbeidet med studieutvikling og utdanningskvalitet, fortel NLA-rektor Egil Morland i ei pressemelding.
Sidan 1. januar i fjor har Langøy vore tilsett som utdanningsleiar ved NLA og har arbeidd tett med Svenning Bjørke, tidligare prorektor for utdanning. Frå 18. mars har Langøy vore konstituert i stillinga, og med verknad frå 1. juli i år blir dette permanent for dei neste to åra.
— Eg er svært glad og nøgd med at Langøy ønsker å gå inn i dette arbeidet. Når vi no for alvor skal inn i prosessen med NOKUT er det viktig å ha kontinuitet i leiargruppa. Stabilitet, saman med forankring i leiinga i alt som skjer ved høgskulen, er eit kritisk punkt i kvar og ein organisasjon, seier Morland.
