Har lagt ned over ti prosent av kyrkjene sine: – Blir ikkje overraska om vi må legge ned fleire

Metodistkyrkja i Norge sitt årlege «kyrkjemøte», Årskonferansen, er i gong.

På agenda står fleire avgjerande spørsmål. Får forslaga som ligg på bordet gjennomslag, vil trussamfunnet mellom anna opne for likekjønna vigsel.

Det er likevel ikkje berre teologisk usemje metodistane står overfor; dei siste åra har dei nemleg lagt ned over ti prosent av kyrkjelydane sine.

Fleire kan legge ned

Metodistkyrkja i Norge har rundt 40 kyrkjelydar over heile landet, men talet går stadig nedover.

Haugesund, Svolvær, Hamar, Kongsberg, Elverum og Sotra er berre nokre av døma.

I sin tale til trussamfunnet sitt «kyrkjemøte» var tilsynspresten, Knut Refsdal, open om denne utfordringa.

– Det er klart vi er bekymra når vi ser på situasjonen. Og eg må vere såpass ærleg å seie at eg ikkje blir overraska dersom vi i løpet av dei neste åra må legge ned endå fleire kyrkjelydar, sa han.

– Å vere i ein slik situasjon gjer noko med oss.

– Det gjer vondt

Etter tilsynspresten hadde talt, opna Årskonferansen sin årlege generaldebatt.

Ove Braaten, delegat frå Centralkirken i Bergen, var ein av dei som då tok ordet.

Braaten peikar på at dersom ein legg ned i same tempo som i dag, vil det ikkje vere mange forsamlingar igjen om 20 år.

– Det gjer vondt, seier han.

Samtidig meiner han det nokon gongar er rett å legge ned, men at slike forsamlingane bør få ei verdig avslutning.

Det meiner han nemleg at ikkje alltid er tilfelle.

– Eg høyrer at i nokon kyrkjelydar er det ingen frå kyrkja si leiing til stades den dagen ein set strek.

– Eg trur vi kunne vere litt flinkare å uttrykke ein takk til dei menneska som har gitt heile sitt liv i ein kyrkjelyd, seier han.

Var ikkje til stades

Marit Bjørnevik er pensjonert pastor og har tidlegare tenestegjort i Haugsund Metodistkyrkje, som no er lagt ned.

Ho har difor følgt nedlegginga av kyrkjelyden tett, forklarte ho, då ho greip ordet under behandlinga av hovudstyret i Metodistkyrkja sin årsrapport.

Bjørnevik kritiserer, i likskap med Braaten, korleis leiinga behandlar kyrkjer som legger ned drifta.

Ho hevdar nemleg at ingen frå Metodistkyrkja nasjonalt var til stades då Metodistkyrkja i Haugesund takka av.

– Eg følte at der svikta kyrkja, for det var ingen til stades frå kabinettet (tilsynsprestane og biskop journ.anm.) eller kyrkjeleiinga, seier ho.

Ho understrekar at det kan ha hatt sine årsaker, men at det hadde vore godt med ei helsing frå sentralt hald på ein slik dag.

– Det sakna eg, og eg veit at mange i kyrkja i Haugesund var skuffa og litt fortvilt for det, seier ho.

Hadde ikkje høve

Ingull Grefslie svarar på kritikken på vegne av den nasjonale leiinga til Metodistkyrkja i Norge.

Ho er ein av tilsynsprestane her til lands.

Grefslie meiner den nasjonale leiinga som regel er til stades når ei lokal forsamling legger ned, men forklarar at dei ikkje hadde høve for å vere på avskjedsgudstenesta til Haugesund metodistkyrkje fordi dei var i utlandet då.

Likevel, seier ho, var dei til stades når kyrkjelyden formelt sett blei lagt ned.

Elles forklarar ho at dei formelle takkebreva frå den nasjonale leiinga kjem etter kyrkjelydane formelt sett er lagt ned av Årskonferansen til Metodistkyrkja, som altså finn stad denne helga.