Har starta kristent nettverk i Rødt

Norheim er fjerdekandidat på Rødt Rogaland si stortingsvalsliste. Han trur Rødt kan vere tent med å rekruttere fleire kristne.

Rogalendingen etablerte difor eit kristent nettverk på Facebook, der medlemmane kunne diskutere med kvarandre.

Nettverket er i oppstartsfasen og har no rundt 30 medlemmer.

Fellesskap

– Kvifor ville de ha eit kristent nettverk i Rødt?

– Det å finne eit fellesskap er ein typisk kristen norm, og det er viktig å finne seg eit fellesskap. Mange kristne har følt seg åleine i Rødt, forklarar Norheim.

– Det er ikkje så mange som forbinder Rødt med kristendom?

– Det er ikkje nokon hemmelegheit at Rødt hovudsakleg består av sekulære folk.

Det håpar Norheim at vil endre seg. Han seier at nettverket har eit mål om å nå ut til fleire kristne miljø.

– Vi ynskjer å få fram at Rødt er eit reelt alternativ for kristne.

Positiv respons innad

Norheim fekk ideen til nettverket etter å ha snakka med tre andre landsstyrerepresentantar i Rød ungdom. Alle fire er kristne, og ville ha dette perspektivet med i diskusjonane i Rødt, forklarar han.

Dei bestemte seg for å skrive eit lesarinnlegg i avisa Vårt Land, der dei oppmoda kristne til å stå saman mot kapitalisme.

I følgje Norheim fekk dei enormt positiv respons innad i Rødt og i kommentarfeltet.

– Veldig mange var positive til innlegget, til trass for at det kristne perspektivet ikkje nødvendigvis har stått sterkt i partiet tidlegare, seier Norheim.

Ingen møter endå

Til no har dei berre hatt diskusjonar på Facebook, men dei ynskjer å ha møter etter kvart.

– Eg prøver å setje saman ei gruppe som tek litt styringa, så ikkje alt ligg på meg, forklarar han.

Jesus tok side med dei fattige

– Kva kan det kristne perspektivet bidra med til Rødt sitt partiprogram?

– Jesus tok side med dei fattige. Det står fleire stader i Bibelen at målet er å hjelpe menneske fri frå undertrykking, seier Norheim.

Politikaren viser til Jakobs brev i Bibelen kapittel 2, der det mellom anna står:

«Mine sysken, de kan ikkje tru på vår Herre Jesus Kristus, herlegdomens Herre, og samtidig gjera forskjell på folk».

– Rødt har den politikken som er nærast dette perspektivet. Bibelen seier at alle er elska, og at vi ikkje skal gjere forskjell på folk, seier Norheim.

Mot undertrykking

– Kvifor meiner du kristne bør stemme på Rødt?

– Vi treng ein politikk som vil kjempe for klimaet og kjempe mot undertrykking. Eg synest Bibelen er tydeleg på det. Den viktigaste bodskapen til Rødt er at vi skal kjempe for dei som er urettferdig behandla, og ikkje nødvendigvis kvar vi legg oss i abortspørsmålet eller til homofile.

– Nokre kristne veljarar vil hevde at barna som vert abortert vert urettferdig behandla, kva vil du seie til dei?

– Det er ikkje vår jobb som kristne å ta val for andre. Vi i Rødt er opptekne av eit fritt samfunn, og det trur eg mange kristne er òg. Viss kristne seier «vi må forby abort», så øydelegg ein fridommen til folk. Då bør ein heller kjempe for seksualundervisning og førebyggande tiltak mot abort.

Miljøkamp

Rødt-politikaren meiner at klimakampen burde vere meir viktig for fleire kristne. Han ser ein samanheng mellom kristen tru og miljøkamp.

– Jordkloden er Guds skaparverk, og då skal vi ære kloden og ta vare på den. Vi skal ære Gud i alt vi gjer, og ein ærer ikkje Gud ved å øydelegge jordkloden, avsluttar Norheim.

Ikkje overraska

Valforskar Bernt Aardal er ikkje overraska over at det finst eit kristent nettverk i Rødt. Han har forska på veljaratferd i ei årrekkje som professor ved Universitetet i Oslo.

– Det finst jo gruppar av kristne veljarar i alle parti, sjølv om Rødt på ein måte utpeiker seg som eit meir sekulært parti totalt sett, seier Aardal.

Han forklarar at denne typen nettverk har blitt vanlegare etter vi fekk sosiale medium.

– No er det berre å lage ein Facebookgruppe for likesinnede, forklarar forskaren.

Treng ikkje gå KrF i næringa

– Korleis kan Rødt rekruttere kristne veljarar?

– Det er ikkje sikkert at Rødt må ha nokre spesielle kristne hjartesakar for å nå dei kristne veljarane. Men negative punkter til kristendom og livssyn er noko som kan ramme dei.

Aardal trur ikkje Rødt må byrje å gå KrF i næringa, då det er mange hensyn veljarar skal vege opp mot kvarandre.

– Kan Rødt ta veljarar frå KrF i haust?

– Nei, det trur eg ikkje nødvendigvis handlar om slike nettverk. Det handlar meir om den totale politikken, og for ein Rødt-veljar så er avstanden til KrF veldig stor på den klassiske høgre-venstre-aksa. Det er ikkje KrF dei kan ta flest veljarar frå, sier Aardal.