EINSAM STEMME: – Eg sit med ei kjensle av at det berre er vi som reagerer. Men det kan då umogleg vere berre oss? undrar Solveig Synnøve og Øyvind Holmby.
Andrea Øien Sæverud
Held barna heime frå barnehagen i protest mot Pride-tog
- Vi knyter Pride til noko seksualisert, seier ekteparet som fredag lèt vere å sende barna i barnehagen.
Tidlegare i juni skreiv NRK om ein oslobarnehage der barna gjekk i Pride-tog med regnbogeflagg som ein del av sommarfesten. Regnbogen blir brukt som fellessymbol for heile homomiljøet og skal symbolisere styrke, solidaritet, og mangfold. Fredag markerte ein annan barnehage i hovudstaden også Pride, dagen før det store opptoget gjennom Oslos gater.
Foreldra i Espira Marienfryd fekk i forkant informasjon om markeringa og toget, som hadde som mål å lære barna om toleranse og likeverd. Dei som ikkje ønskte å vere med, fekk ikkje tilbod om eit alternativt opplegg. Øyvind og Solveig Synnøve Holmby valde derfor å halde gutane sine heime frå barnehagen.
– Eg synest det er eit overtramp. Det er ikkje mi oppgåve å dømme andre. Alle må få ha dei meiningane dei vil. Men den dagen det blir tvinga på meg, der går grensa, seier Øyvind Holmby.
