Held barna heime frå barnehagen i protest mot Pride-tog

Tidlegare i juni skreiv NRK om ein oslobarnehage der barna gjekk i Pride-tog med regnbogeflagg som ein del av sommarfesten. Regnbogen blir brukt som fellessymbol for heile homomiljøet og skal symbolisere styrke, solidaritet, og mangfold. Fredag markerte ein annan barnehage i hovudstaden også Pride, dagen før det store opptoget gjennom Oslos gater.

Foreldra i Espira Marienfryd fekk i forkant informasjon om markeringa og toget, som hadde som mål å lære barna om toleranse og likeverd. Dei som ikkje ønskte å vere med, fekk ikkje tilbod om eit alternativt opplegg. Øyvind og Solveig Synnøve Holmby valde derfor å halde gutane sine heime frå barnehagen.

– Eg synest det er eit overtramp. Det er ikkje mi oppgåve å dømme andre. Alle må få ha dei meiningane dei vil. Men den dagen det blir tvinga på meg, der går grensa, seier Øyvind Holmby.

– Kvifor er det så problematisk at barnehagen arrangerer ein Pride-marsj?

– Fordi eg tenker ikkje på Pride som det barnehagen ønskjer det skal vere. Eg knyter det ikkje berre til stoltheit og likeverd, men til noko seksualisert. Barn skal vere barn og ikkje bli blanda inn i dette, forklarer Holmby.

Regnbogesjokk

At barna ikkje skulle vere med på markeringa, var eit val han og kona tok allereie i fjor. Då kom den første Pride-feiringa i barnehagen bardust på dei.

– Eg hugsar eg kom om morgonen for å levere ungane og fekk heilt hetta då eg såg regnbogegardinene og alt som flagra rundt. Eg blei heilt sjokkert, seier Øyvind Holmby.

Han fortel at både kristne og ikkje-kristne kollegaer blei svært overraska då han kom på jobb og fortalde kva han hadde opplevd. Kona Solveig Synnøve Holmby meiner det barnehagen ønskjer å lære barna er flott, men at det blir gjort på feil måte.

– Dei prøvar å formidle at alle er like mykje verdt, og det er vi superpositive til. Men dei treng ikkje å kople det på Pride. Ei slik markering kunne dei hatt når som helst elles i året, ikkje dagen før det store Pride-toget i Oslo, seier ho, og legg til:

– Vi vil ha hovudansvaret for oppdraginga.

– Følgjer rammeplanen

På inngangsporten til Espira Marienfryd formar fingerhekla, fargerik tråd ordet Pride. Styrar Trine-Lise Antonsen forklarer at feiringa likevel ikkje er ein avleggar av det store toget, men ei markering dei har gjort til si eiga, gjennom blant anna å omtale den som Stoltheit.

– For oss handlar det ikkje om politikk, men om det som står i rammeplanen og som vi er lovpålagde til å følgje. Vi vil fremje demokrati, mangfald og respekt. I barnehagen vår har vi ulike familiekonstellasjonar, og det er viktig for oss å vise barna våre at alle desse har like stor verdi.

– Dette handlar heller ikkje om seksualitet, men om å vere stolt av den ein er. Det skal vere OK for ein gut å kle seg i kjole og OK for ei jente å kle seg ut som Spiderman, seier ho.

I informasjonen som har gått ut til foreldra har dei brukt både omgrepa Pride og Stoltheit om markeringa.

– Kunne de like gjerne hatt ei markering av toleranse og likeverd ei anna tid på året?

– Eg ser ikkje vekk frå det. Samtidig ser eg ingen grunn til det, når vi no likevel har gjort det til vårt eige, seier Antonsen.

– Politisk agenda

For foreldreparet som valde å halde barna heime, er regnbogetoget i barnehagen likevel lada med politisk meining.

– Både Pride og FRI - Foreningen for kjønns- og seksualitetsmangfold som står bak, har ein politisk agenda. FRI står for andre kontroversielle haldningar som vi ikkje stiller oss bak, forklarer dei.

Øyvind Holmby peikar på at markeringa kanskje vil vere endå meir kontroversiell blant muslimar og katolikkar.

– Enkelte av dei vil kanskje oppfatte det som eit endå større overtramp enn oss? Samtidig trur eg det er stor forskjell på by og land. Eg trur ikkje dette kunne skjedd andre stader enn Oslo, seier han.

Vanskeleg å kritisere

Ekteparet synest det er utfordrande å kritisere ein barnehage som dei elles er strålande fornøgde med.

– Vi er utruleg fornøgde med den kjærleiken og omsorga dei vaksne har vist for barna våre. Både vi og ungane våre er veldig glade i dei som jobbar der. Dei klarer verkeleg å sjå barna våre og vi er veldig fornøgde med det pedagogiske opplegget. Barna våre elskar barnehagen. Derfor er det så dumt at denne eine saka gjer det så vanskeleg for oss, seier Solveig Synnøve Holmby og utdjupar:

– Det er vanskeleg å vere mot noko slikt, fordi ein med ein gong blir sett på som diskriminerande, gammaldags og konservativ.

Ho forklarer at dei sit med ei kjensle av at det ikkje er lov å seie imot Pride-markeringar, då blir ein sett i bås som motstandar av verdiar som toleranse og likeverd. Verdiar dei sjølve set høgt.

– Alle skal liksom vere med på det. Viss du meiner noko anna, opplever vi ikkje den same toleransen tilbake. Når ein seier at ein står for ein klassisk mor-far-barn-familieordning som det beste, blir ein kraftig motsagt, seier Solveig Synnøve Holmby.

– Vi hadde høve til å starte sommarferien ein dag tidlegare og vere heime med ungane. Det er det ikkje alle som kan. Når ein ikkje får eit val, blir det feil. Det burde heller vore som med julegudstenestene i skulen. Dei som ikkje ønskjer å vere med kan velje det vekk, seier ho.

Vil finne alternativ

I Espira Marienfryd har to av dei tilsette vore på eit frukostseminar med FRI og undervisningsopplegget Rosa kompetanse, som mellom andre Den norske kyrkja har brukt som rådgivarar. Seminaret blei tilbode av Bydel Grünerløkka.

– På lik linje med alle andre kurs vi går på, gjer vi ei sjølvstendig vurdering i etterkant av kva som er relevant for oss å ta i bruk av det vi har høyrt, forklarer styrar Trine-Lise Antonsen.

– Forstår de at dette kan vere ein vanskeleg situasjon for enkelte foreldre?

– Ja, eg ser at det ikkje er lett, og det respekterer vi. Også dei som vel å ikkje vere med, er gode nok som dei er. Dersom dei i forkant hadde spurt om eit alternativ, ville vi ha laga eit alternativt opplegg. Det må vi kanskje vurdere å gjere til neste år, sidan det no har kome reaksjonar, seier Antonsen.

------------

Fakta: Pride i barnehagen

• Barnehagen Espira Marienfryd i Oslo markerte fredag Pride med fest og tog rundt kvartalet.
• Barnehagen viser til desse formuleringane i rammeplanen:
• «Barnehagen skal synliggjøre et mangfold i familieformer og sørge for at alle barn får sin familie speilet i barnehagen.»
• «Barnehagen skal fremme likeverd og likestilling uavhengig av kjønn, funksjonsevne, seksuell orientering, kjønnsidentitet og kjønnsuttrykk, etnisitet, kultur, sosial status, språk, religion og livssyn. Barnehagen skal motvirke alle former for diskriminering og fremme nestekjærlighet.»

Nei til Pride i barnehagen

Prideparader, barn og vår nye skeive virkelighet

Her er barnehagen som arrangerte Pride-tog

– Konservative blir plassert i «bøttekott»

Barns deltagelse i homokampen

– Kan bli uthengt om man ikke bruker regnbuefargene