Her er brettspela som kan lyse opp jula

Den kanskje største brettspelentusiasten i landet, Remo Rehder, som også er grunnleggjar av den uavhengige forbrukaropplysningssida Brettspelguiden, er klar på at det finst eit rikt utval spel som eignar seg framifrå som juleunderhaldning.

Og i bokbutikkane blir trenden stadfesta: Folk er innom og kjøper analog moro som puslespel, kortspel og tradisjonelle brettspel – som aldri før. Koronakrisa har ført til at vi må vere meir kreative i eigen heim, og dermed er dei gode gamle brettspela gode å ty til.

– Hovudgrunnen til at brettspela held seg så godt, er vel at det er ein unik sosial aktivitet som både skapar konkurranse, glede og moro. Og der alle deltakarane er opptekne av det same, samtidig. I tillegg så er det jo enorm variasjon i typar spel, eg tør påstå at det finst eit spel for absolutt alle. Sjølv for dei som «ikkje likar spel», finst det nok eit eller anna spel som vil trigge dei, berre dei blir introduserte for det på den rette måten, meiner Remo Rehder.

Pur familiehyggje

Kva spel som er spesielt i bruk i jula, tør ikkje spelentusiasten meine så altfor mykje om. Her er det like mange tradisjonar som det er heimar, meiner han.

– Samtidig veit eg at det i fleire område av landet er lange tradisjonar for å spele «Gnav» i jula, noko eg sjølv òg gjer i tre juleselskap, seier Rehder. Som meiner ein viktig faktor med spela er at det er noko vi kan samlast om å gjere – i motsetning til dei fleste skjermbaserte underhaldningane.

– Det er vel ikkje så mange TV-seriar som heile familien synest er interessant? Og konsollspel er vel noko ein primært gjer åleine, eller med få andre. Men uavhengig av det, så er det godt å kunne gjere noko som ikkje blir styrt tidsmessig av andre, og der det er rom for ein god samtale, eller ein god latter, om det oppstår.

Senkar pulsen

På spørsmål om kva folk som må feire jula åleine kan gjere på spelmorosida, svarer han:

– Brettspel er så populært at det i dag blir laga online versjonar/appar av nesten alle spela, i alle fall dei som oppnår ein viss suksess. Det er til og med sånn at dei ivrigaste blant oss kan teste ut prototypar online. Fleire forlag har eigne nettstader for titlane sine, og det finst nettstader som BoardGameArena, Tabletopia og Boardgamesimulator, for å nemne nokre. Der vil du møte likesinna frå heile verda, og eit enormt utval spel, primært på engelsk, vel å merke.

Rehder opplyser òg at veldig mange spel kan spelast i «solo mode», med nokre få endringar i reglane, som anten er vedlagde eller kan finnast på nettet.

– Elles er det jo ein del spel som er meint å spelast åleine òg, sjølv om veldig mange av dei ofte tenderar mot pusleoppgåver. For meg er det å setje seg ned med eit lite brett og nokre få brikker, og løyse diverse oppgåver, god hjernetrim, det er noko eg ofte gjer for å senke pulsen eller rett og slett berre kose meg. Utgivaren «Smart games» vil eg på det varmaste tilrå i så måte.