Human-Etisk Forbund tar innpå Den norske kyrkja – har aldri hatt fleire konfirmantar

Den norske kyrkja tok i fjor imot cirka 33.000 konfirmantar, men kulla minkar meir og meir.

Slik er det ikkje for Human-Etisk Forbund.

Dei har sett ny rekord med over 15.000 påmelde til neste år.

– Vi ser at livssynslandskapet er i endring, seier Christian Lomsdalen, leiaren i forbundet.

Ikkje berre eit alternativ

Lomsdalen er fornøgd etter dei ferske tala kom inn, og seier han føler seg audmjuk.

Han trur det er komplekse grunnar til kvifor dei veks medan kyrkja går nedover, men er tydeleg på kva som er status quo.

– Vi har gått frå å vere eit alternativ, til å vere ein likeverdig aktør med kyrkja i denne marknaden.

– Kvar kjem suksessen frå?

– Alle dei åra vi har levert ei god konfirmasjonstid for tenåringar i heile landet, har gitt oss eit godt rykte. Det er også fleire endringsprosessar i samfunnet som spelar på lag. Vi ser at færre og færre trur på Gud, og fleire og fleire får eit livssyn som liknar vårt.

Humanetikaren seier dei ikkje har nokre konkrete ambisjonar om å bli størst, men er mest opptatt av å tilby ei god konfirmasjonstid.

– Eg lever fint med at det er to store aktørar. Det viktigaste er at tenåringar i heile landet skal kunne konfirmere seg i tråd med sitt eige livssyn, seier han.

Ei utfordring

Vidar Mæland Bakke er prest i ByMenigheten – Sandes. Dei har ikkje merka noko nedgang i konfirmasjonskulla lokalt, men han trur dei er i ein unik situasjon.

Kyrkjelyden har i utgangspunktet avgrensa størrelse på kulla, og ligg i ein by med eit stadig aukande folketal.

Presten trur Den norske kyrkja må ta tak for å behalde posisjonen som den største aktøren på konfirmasjon.

– Human-Etisk Forbund kan potensielt bli den største aktøren med tida. Difor er det er viktig å erkjenne at kyrkja ikkje lenger er ein sjølvsagt del av det norske samfunnslivet. Det kan gjere oss meir bevisst på den misjonssituasjonen vi står i, seier han.

Presten ser likevel lyst på det.

– Dette er ein moglegheit for Den norske kyrkja til å heve kvaliteten på det vi leverer og ha ei tydeleg profil. Vår styrke kan ligge i å bygge fellesskap og gi konfirmantane eit møte med det andelege, seier han.