Hundar slepp inn i engelske katedralar

Canterbury-katedralen var tidlegare i juli den siste til å annonsere at besøkande kan ta med veldresserte inn, ifølgje nettsida englishcathedrals.co.uk.

Denne katedralen er setet til den øvste leiaren i Church of England, erkebiskop Justin Welby.

Siktemålet er å utvikle «fellesskap og samband» og at dei skal fungere som ein «isbrytar» for kyrkjebesøkande, skriv The Telegraph.

Hundar i kyrkjekunst

Frå før har det vore lov å ha med førarhundar, høyrehundar og assistenthundar på kyrkjebesøk eller gudstenester. .

No har ein fleire stader utvida det til alle som har med hund, også om det ikkje er ut frå eit personleg behov. Håpet er at det skal verte endå meir attraktivt å leggje turen innom kyrkjene.

Domprosten i Canterbury Cathedral, David Monteith, er glad for å prøve dette ut.

– Hundar er ikkje framande på innsida av katedralen, seier Monteith, men viser til at det då ofte gjeld i kyrkjekunst.

– Ofte symboliserer dei truskap og lojalitet, eier han.

Pilegrimsvandring på potar

Besøkande blir bedne om å halde hundane under oppsyn heile tida og tørke opp dersom dei har uhell.

Katedralane i mellom anna Durham, Lincoln, Wells og Chichester er andre som har opna for det same. Sistnemnde har også utvikla ein eigen ressurs «Pilgrimage on paws» (Pilegrimsvandring på potar) for dei som vil gå saman med hunden.

15 av 42 seier ja

Undersøkinga National Churches Trust poll, som omfattar 285 britiske kyrkjer, viser at 63 prosent tek imot hunder eller held gudstenester tilpassa kjæledyr, melder euronews.com

Av dei 42 katedralane i England og Wales, er det 15 som no tillet hundar på besøk og førarhundar også under gudstenester.

Omstridd bruk av katedralar

Reglane vert mindre strenge samstundes med at kyrkjebesøket i Storbritannia går kraftig tilbake. Det samla oppmøtet ein vanleg søndag i Church of England fall frå 707.100 i 2019 til 509.200 i 2021, skriv The Telegraph.

Fleire katedralar har gjort kontroversielle val for å tiltrekkje seg fleire gjester. I 2019 sette katedralen i Norwich opp eit nesten 20 meter høgt tårn framme i koret for at ein skulle kunne sjå nærare på taket.

Same året vart det sett opp ei minigolfbane i katedralen i Rochester. Det fall ikkje i smak hos alle.

«Den anglikanske leiarskapen får kristendommen til å sjå tåpeleg ut ved å gjere katedralar til tivoli», skreiv kommentatoren Tim Stanley i The Telegraph.

I katedralen i Southwark, nær den norske sjømannskyrkja i London, vart det i 2019 arrangert moteshow med svært lettkledde modellar, melde Premier Christian News.

Ser ingen innvendingar

Ein talsperson for Church of England seier at dei ikkje har ei sentral gitt retningslinje i spørsmålet og legg til at ein ikkje ser teologiske innvendingar mot å sleppe kjæledyr inn i kyrkjer eller katedralar.