Ingen under 30 i den norske kyrkje-delegasjonen – Sofie (22) fekk ikkje bli med

I desse dagar samlast 4.000 representantar frå 352 medlemskyrkjer til Kyrkjenes verdsråd si generalforsamling i den tyske byen Karlsruhe.

Sofie Marcelie Hopshaug-Bakke er leiar for Ungdomsrådet i Nidaros bispedømme.

Ho reagerer på at det ikkje er nokon under 30 år i den norske delegasjonen.

Underrepresentasjon av unge

Hopshaug-Bakke var representant for Den norske kyrkja på eit økumenisk ungdomsmøte som blei avhalden i forkant.

Ho sit igjen med det ho beskriv som «ei heilt unik oppleving».

– Det er noko eg trur eg vil hugse lenge, seier ho.

Likevel er ho skuffa over den unge representasjonen på sjølve generalforsamlinga.

– Det er ingen til stades i den norske delegasjonen under tretti. Det syns eg er utruleg synd. Ein snakkar mykje om at ein saknar ungt engasjement, likevel verkar det som dei ikkje tar unge på alvor, seier ho.

Det økumeniske ungdomsmøtet sende ei felles fråsegn til sjølve generalforsamlinga, men måtte dra heim når den starta.

– Vi prøvde å sjå om vi kunne få bli litt til, men det fekk vi ikkje.

Generalforsamlinga er berre kvart åttande år.

– Då er eg tretti, seier Hopshaug-Bakke.

Framtida til kyrkja

Ungdomsrådsleiaren meiner unge stemmer er viktig når ein skal diskutera framtida til kyrkja.

– Det er ikkje ei ukjend sak at menneske er veldig glad i å berre la ting vere slik det er vist det fungerer heilt greitt. Men unge er med på å dra kyrkja framover, dei legg eit større press på at kyrkja skal utvikla seg, seier Hopshaug-Bakke.

Ho meiner det er eit mangfaldsproblem når ingen under tretti er med.

Generalsekretær i Noregs kristne råd, Erhard Hermansen, seier Kyrkjenes verdsråd har eit uttalt mål om å ha med unge menneske.

– Vi er heilt avhengig av å få med den neste generasjonen. Ungdom har eit anna perspektiv på økumenisk arbeid, dei har nye blikk som ser ting frå andre vinklar, seier han.

– Veldig dumt

Internasjonal direktør i kyrkjerådet, Berit Hagen Agøy, er heilt einig med Hopshaug-Bakke.

Ho forklarar at kor mange medlem kyrkjene har, avgjer kor mange delegatar dei får. I tillegg supplerer sentralkomiteen med ekstra kandidatar for å sikre brei representasjon ut frå ulike kvotar.

Dei nordiske landa sine kvotar er koordinert.

– Vi skulle veldig gjerne hatt med ein ungdom frå Noreg, men denne gongen har andre nordiske land fått ungdomsdelegatar, seier direktøren.

Ho meiner unge er heilt avgjerande både for notida og framtida til kyrkja.

– Kyrkja dør om vi ikkje har med ungdom.

På generalforsamlinga skal det bli valt ny sentralkomité.

– Vi vil gjere det vi kan å få inn ungdom der, seier ho.