Israel er favoritt til å vinne Eurovision

Trass i at songane for neste års Eurovision ikkje er slept enno, ser Israel ut til å gjere det godt.

Dei toppar nemleg oddslista, melder NRK.

Når songkonkurransen i 2024 går av stabelen i Malmö, kan dermed eit land i krig vinne den upolitiske konkurransen.

Det får fleire til å reagere.

Umogleg å unngå politikk

Linda Eide er programleiar i NRK og har eit stort engasjement for Eurovision.

Ho meiner konkurransen alltid har vore politisk, trass i at den ikkje skal vere det. Den kjente NRK-profila lar seg ikkje overraska over at det er Israel som ligg på topp.

Samtidig seier ho til statskanalen at det er «ganske sprøtt sidan ingen har høyrt songane enno».

Tatt til ordet for boikott

I forkant av konkurransen har tusenvis av nordmenn signert eit opprop om boikott av Israel, ifølgje statskanalen.

– NRK har rettane til å visa Eurovision i Noreg. NRK burde koma med heilt tydelege krav til administrasjonen i Eurovision og visa at ein ikkje kan stilla seg bak Israel si deltaking, sa musikar Marthe Valle nyleg.

Ho har lenge vore engasjert for at Eurovision skal boikotte Israel. Etter invasjonen av Ukraina vart Russland utestengd. Difor meiner ho det er inkonsekvent å ikkje også stengje ute Israel etter at krigen braut ut.

Den europeiske kringkastingsunion, EBU, er vert for songkonkurransen.

Dei svarar NRK i ein e-post. «Dette er ein konkurranse for kringkastarar, ikkje styresmakter», hevdar dei. EBU er også blitt einige om «at den israelske kringkastaren oppfyller alle konkurransereglane og kan delta i konkurransen neste år», skriv dei.

Vant i 2018

Førre gong Israel vann konkurransen var i 2018 med Netta Barzilais song «Toy». Då låg landet på andreplass på oddslista, bak Kypros.

Også den gongen skapte det debatt. Fleire tok til ordet for ein boikott.

Og då vinnaren rett etter sigeren var annonsert braut ut «neste år i Jerusalem!», gjorde det ikkje ting betre.

Utsegna er i utgangspunktet ei jødisk frase som handlar om håp og ei betre framtid. Fleire tolka det likevel reint konkret.

Det skapte mykje reaksjonar at den politisk omstridde byen såg ut til å skulle arrangere ein konkurranse som hevdar å vere upolitisk.

Ein landa til slutt på å leggje konkurransen til Tel Aviv.