Justisminister kallar kristen bakar modig
Strid om kake til homobryllaup er eit døme på kvifor justisminister Jeff Sessions opprettar ei gruppe som skal sikre amerikansk trusfridom.
Siktemålet er å utfordre det justisministeren kallar ei farleg rørsle som «undergrev vår sterke tradisjon for religionsfridom». Då han lanserte tiltaket på måndag, forklarte Sessions at det er eit resultat av presidentordren Donald Trump gav i fjor haust. Denne sa at offentlege føretak skal verne trusfridomen. Sessions påpeikar at ein også vil minne tilsette i Justisdepartementet om at dei pliktar å ta omsyn til truande menneske.
– Denne regjeringa er driven av det same amerikanske synet som har vore førande for oss i 242 år - at kvar amerikanar har rett til å tru og tilbe, og til utøve trua si i det offentlege romet, sa Sessions.
Annonse
Lovar å ta omsyn
Trump-administrasjonen sette internasjonal trusfridom i fokus sist veke gjennom eit tre dagar langt internasjonalt toppmøte i regi av Utanriksdepartmentet. Sessions påpeika at ein del amerikanarar opplever at fridomen til å utøve trua er under åtak.
Han snakka om nonner som vert «pålagde å kjøpe prevensjonsmiddel», noko som viste til eit mandat i Obamas presidenttid. Mandatet tvinga ikkje nonnene til å kjøpe prevensjonsmiddel, men påla arbeidsgivarar å dekkje kostnadar til prevensjonsmiddel i helseforsikringane til tilsette.
Jeff Sessions forsikra om at truande amerikanarar ikkje lenger vil vere ignorerte.
– Vi vil ta potensielle samvitskvalar med i vurderinga før vi kjem med reguleringar eller politiske føringar, sa justisministeren.
Fortalte om kamp
Fleire religiøse leiarar deltok saman med Sessions på toppmøtet. Mellom desse var Jack Phillips, ein kristen bakar frå Colorado som nyleg fekk medhald i Høgsterett etter at han avslo å bake ei bryllaupskake for eit homofilt par fordi han meiner ekteskapet er mellom éin mann og éi kvinne. Sessions rosa han for å vise mot då han vart utfordra med rettssaker.
I ein panelsamtale fortalte eit spekter av religiøse leiarar om sine personlege kampar for religionsfridom. I tillegg til bakaren Phillips var der også ein rabbi som møtte motstand då det skulle byggjast synagoge og ein sikhsk advokat som nekta å barbere bort skjegget og ta av turbanen for å verte tilsett i ein jobb.
Annonse
Spenningane mellom interessene til seksuelle minoritetar og religiøse aktørar vart tekne opp også i spørsmålet om adopsjon. Trusbaserte adopsjonsbyrå meiner dei må ha rett til å ikkje plassere born hos likekjønna par.
– Når aktivistar prøver å presse kristne organisasjonar til å krenke samvitet sitt, tvingar dei kristne opp i eit hjørne, sa den romersk-katolske erkebiskopen Joseph Kurz.
– Vi kan ikkje fråseie oss forpliktinga til å tene, men vi kan heller ikkje vende oss bort frå forpliktinga til kva som er sant om mennesket som person, sa Kurz.
Blanda reaksjonar
Forkjemparar for homorettar og sekularisme reagerte raskt på tiltaket til justisministeren.
– Denne gruppa som er finansiert av skattebetalarane er nok eit eksempel på at Trump og Pence i Det kvite hus og Jeff Sessions sanksjonerer diskriminering av LHBTQ-personar, seier Sarah Warbelow i The Human Rights Campaign.
Alliance Defending Freedom, eit kristent advokatbyrå som forsvarte Jack Phillips, gratulerte derimot Sessions med initiativet.
– Mange av klientane som ADF representerer, risikerer verksemdene sine, sparepengane sine og tryggleiken sin for å følgje samvitet sitt, skriv dei i ei fråsegn.
Annonse
– Alle amerikanarar burde vere frie til å leve i fred og handle i samsvar med overtydingane sine og trua si utan frykt for å verte straffa av styresmaktene.
Sessions skal sjølv leie gruppa som skal arbeide med trusfridom.
