Kan vi ikkje berre vere snille?
Sjølvsagt har vi visst at det er rasisme i Noreg, men at det er så massivt er rystande.
Det var heile Noregs treningsekspert, Yngvar Andersen, som stilte spørsmålet på Facebook denne veka. Drapet på den svarte amerikanaren George Floyd vekte minner om alle gongane han sjølv hadde møtt rasisme. Minner han hadde lagt lokk på, kom til overflata, då Andersen høyrde eit opptak av den 8 minutt og 46 sekund lange dødskampen til Floyd.
Yngvar Andersen fortel at han gjekk rundt i hagen sin og gret i timesvis. Så sette han seg ned og skreiv om sine eigne møter med rasisme. Om korleis han vart kalla svarting, neger og apekatt første gong då han var 13 år. Om korleis han føler at noko døyr inni han når folk uendeleg mange gonger har sagt «du er grei du, men alle desse andre...».
Andersen var rysta heilt inn i «marg, bein, musklar og ledd» over kulden politimennene viste då George Floyd vart drepen. Oppgitt siterer han ein tekst han har sett på Instagram: «Kan ikkje alle berre vere snille med kvarandre?» I eit intervju på NRKs Dagsrevyen vedgjekk han at oppmodinga om å vere snille kanskje er naivt. «Men finst det eigentleg noko alternativ?» spør han.
