Kommune foreslår å strupe støtte til konservative bedehus

Annankvar fredag samlast rundt hundre ungdommar på Bore bedehus i Klepp kommune i Rogaland. Fram til no har kommunen gitt støtte til arbeidet deira, og i fjor fekk ungdomsgruppa over 22.000 kroner.

No kan eit høyringsforslag frå kommunen sette ein stoppar for det.

– Prinsippsak

I forslaget til nye retningslinjer for kulturstøtte foreslår eit kommunalt utval å stille krav om at alle deltakarar er valbare til tillitsverv i organisasjonane som får støtte. Eit mindretal i utvalet ønskjer å stryke punktet.

«Organisasjonen må rekna alle medlemmer/deltakarar som likeverdige når det gjeld å kunne veljast til styre, tillitsverv og posisjonar, uavhengig av samlivsform, seksuell orientering, kjønn eller etnisitet», heiter det i høyringsbrevet som har svarfrist 15 februar.

Dette har fått dei konservative forsamlingane i kommunen til å reagere kraftig.

– Det handlar ikkje om pengar, men om eit inngrep i trusfridomen i Noreg. Dette handlar om prinsipp og at vi skal kunne bestemme kven vi vil ha som leiarar, seier styremedlem i Bore bedehusforsamling, Per Åge Berge.

Han er sjølv frivillig i barne- og ungdomsarbeidet på bedehuset der barna hans er aktive.

– Misbruk av makt

Han er tydeleg på at han delar kommunens ønskje om å hindre diskriminering, men reagerer på at kommunen setter strengare krav for støtte enn staten. Han opplever forslaget som eit forsøk på å styre forsamlinga sine meiningar.

– Å bruke pengar som pressmiddel for å styre i ei retning, er i mine auge eit misbruk av makt, seier han.

– Så du opplever dette som et forsøk på å kontrollere forsamlingane på Klepp?

– Eg opplever det i alle fall som eit tydeleg signal om at dei ikkje anerkjenner det vi står for, og indirekte også arbeidet vi driv. Eg trur dei anerkjenner den sosiale biten og alt det gode som følgjer med, men ikkje det vi står for, seier Berge og legg til:

– Det som er veldig synd er at det er barna og ungdomane som blir offera i denne saka. Den kommunale støtta går hovudsakleg til aktivitetane deira.

Felles svar

I slutten av november blei Klepp kommune kåra til «Norges kristneste kommune» i Vårt Lands uhøgtidlege kåring. Det blei dei fordi dei har flest nattverdsgjestar per innbyggjar i landet, i tillegg til at dei er på landstoppen når det gjeld medlemskap i Den norske kyrkje.

Kommunen har til og med ein kross i kommunevåpenet.

Berge har no alliert seg med andre konservative kristne leiarar på dei mange bedehusa og i frikyrkjene i kommunen for å kome opp med eit felles høyringssvar.

– Problematisk på Jæren

Ein av dei er Jarle Mong som er leiar for den kristne barne- og ungdomsklubben Tu-klubben på Klepp. Han er tydeleg på at kravet om å opne for personar i alle samlivsformer i tillitsverv, er hovudproblemet i forslaget.

– Å skulle ta samlevande homofile eller heterofile sambuarar inn i leiande roller, vil vere problematisk for mange bedehus på Jæren. Det er det springande punktet. Det er ikkje til å legge skjul på, seier Mong og legg til:

– Men eg håpar at debatten vil handle om juss og kor grensene for trusfridomen skal gå, og ikkje om homofili, seier han.

– Har det kome reaksjonar på forslaget?

– Eg trur ikkje så mange har fått det med seg. Mi oppleving er at det ikkje er noko veldig engasjement enno, men kvardagen er innsnevra av koronaen, så det kan vere derfor, seier Mong.

– Lukka miljø

Ordførar Sigmund Rolfsen (Ap) har ikkje vore med i utvalet sitt arbeid, men er tydeleg på at det er behov for å stille strenge krav til kulturstøtte i Klepp kommune.

– Eg har ei forståing av at nokre miljø ikkje ønskjer alle like velkomen som andre. Det har både med toleranse og det å vere eit medmenneske å gjere, noko som burde stått veldig sterkt i desse organisasjonane i utgangspunktet, seier Rolfsen.

– Kva miljø er dette?

– Det er dei religiøse organisasjonane.

– Føler du at trusfridomen deira blir teke omsyn til i dette forslaget?

– Ja. Det er ikkje til hinder for trusfridomen. Eg trudde den var uavhengig av etnisitet, legning og kjønn, men at den handla om toleranse og å vere eit medmenneske.

Skeptisk

Rolfsen meiner likevel at det ikkje er umulig for ein konservativ kristen organisasjon å få støtte.

– Men det kjem an på korleis dei legg det fram. Det er tydeleg at vi har denne typen organisasjonar også på Klepp, og vi må ta omsyn til reaksjonane deira viss dei blir sterke.

– Du er altså open for å lytte til dei?

– Det er jo poenget med ei høyring, men eg er i utgangspunktet veldig skeptisk til denne typen organisasjonar. Det har vi også sett på NRK Brennpunkt, at det er så lukka miljø at det er heilt skremmande viss du kjem på innsida, seier Rolfsen.

Avviser opning

Kultursjef i Klepp kommune, Ulf Ludvigsen, har derimot vore med i utforminga av retningslinjene. Han meiner at dei nye retningslinjene vil gjere det umulig for forsamlingar med eit konservativt samlivssyn å få kulturstøtte.

– Det som står i teksten er at alle som er medlemmar må ha ein rett til å kunne bli valt til verv uavhengig av samlivsform og seksuell orientering. Dersom ein diskriminerer til dømes sambuarar, homofile eller fråskilde, vil dei miste den kommunale støtta, seier Ludvigsen.

Kultursjefen anslår at kristne aktørar vil miste mellom 100.000 og 200.000 kroner i støtte.

Vil krevje eigenerklæring

– Korleis vil de avgjere om ein søndagsskule eller eit ungdomskor diskriminerer?

– Det er ikkje bestemt enno. Eg ser for meg at det må vere ei form for stadfesting i samband med søknaden om støtte. Altså ei slags eigenerklæring der ein kryssar eller signerar på at ein oppfyller desse krava.

– Så aktivitetar med eit konservativt samlivssyn må eventuelt signere på at dei går bort frå standpunkta sine?

– Ja. Det betyr ei stadfesting på at her er alle likeverdige og kan bli valt til verv, seier Ludvigsen.

Saka er venta å bli behandla i kommunestyret i løpet av våren.

Rødt-profilen slakter støtte-nekt til bedehus

De burde vite bedre, særlig på Klepp

Vil Klepp bryte menneskerettene?