Krev at elevar på katolske skular brukar pronomen i samsvar med biologisk kjønn

Eit katolsk skulesystem i den amerikanske delstaten Massachusetts har innført reglar som seier at elevar må bruke namna og fødselskjønnet. Dei er også forventa å opptre på ein måte som er «konsistent med det biologiske kjønnet deira», skriv New York Times.

Tiltaket har utløyst protestar. Rundt 100 personar møtte fram utanfor kontora til bispedømmet i byen Worchester i slutten av august, melder telegram.com.

Åtvarar mot å forfalske sanninga

Reglane vart kjende gjennom eit brev godkjendt av biskop Robert J McManus. Dei omfattar 21 skular med meir enn 5.000 elevar.

Nokre skular har allereie reglar, men det skal vore einskilde episodar som har vist behov for ein einskapleg politikk.

Bispedømmet understrekar at ein ikkje vil akseptere mobbing, trakassering og andre former for trugsmål mot studentar basert på deira seksuelle orientering eller kjønnsidentitet. Men elevar kan heller ikkje «kjempe for, feire eller uttrykkje likekjønna tiltrekking på ein slik måte at det forårsakar forvirring eller forstyrring i samanheng med katolsk klasseundervisning, aktivitetar eller arrangement».

«Vi tener ikkje nokon til det beste ved å forfalske sanninga, for det er berre sanninga som frir oss til det fylden av det livet som Gud gir kvar og ein av oss», heiter det i brevet frå bispedømmet.

Nektar å bøye av

Kritikarar meiner Den romersk-katolske kyrkja sender tvetydige signal om seksuell orientering, åtferd og identitet. På den eine sida har pave Frans åtvara mot å stille seg til dommar, på den andre sida har ein stadfesta at læra om ekteskap mellom éin mann og éi kvinne som den einaste ramma for seksuelt samliv.

Demonstrantrasjonen mot retningslinjene var organisert av fleire organisasjonar som kjempar for aksept av kjønns- og seksualitetsmangfald.

– Vi er her for å støtte og stadfeste våre LHBTQ+-folk, sa Joshua Croke i organisasjonen Love Your Labels ifølgje telegram.com.

– Vi er her for å lage bråk. Vi ser på dette (reglementet journ. merkn.) som ei valdshandling mot unge menneske, og vi ber alle i lokalsamfunnet om å stå fram og seie at vi ikkje vil bøye av, sa Croke.

Kjelde til konflikt

Spørsmål om kjønn, seksualitet og identitet er eit tema som skaper mykje friksjon i amerikansk kultur og samfunnsdebatt. Befolkninga har gått i liberal retning, særleg dei siste tre tiåra.

Særleg tydeleg vert det i synet på likekjønna ekteskap. I 1996 var det 27 prosent som støtta dette og 68 prosent som var imot, ifølgje Gallup. I 2023 er det nesten snudd på hovudet: 71 prosent er for, 28 prosent er imot.

Undersøkingar viser at amerikanske katolikkar er meir liberale enn kyrkjesamfunnet sitt i slike spørsmål.