KrF vil kapre Senterparti-veljarar

Analyse:

Det har lenge vore kjent at KrF har sikta seg ut menigheter som den viktigaste målgruppa i denne valkampen.

Dei mobiliserer med eitt mål i sikte: Å kome over sperregrensa på fire prosent.

Problemet er berre at det er knapt nok med veljarar i denne gruppa.

Ved førre val var dei fattige 5000 røyster over sperregrensa. Etterpå vart partiet kløyvd i vegvalsprosessen og gjekk inn i regjering. At dei gjekk inn i regjering med Frp mot tidlegare lovnader, fall mange tungt for brystet.

Det som ikkje har vore kjent til no, er at KrF-strategane har sett seg ut ei målgruppe til: Senterparti-veljarar på vandring. Det fortel ei sentral plassert kjelde i KrF til Dagen.

Då landsmøtet i Senterpartiet i begynnelsen av juni peikte på partileiar Trygve Slagsvold Vedum som statsministerkandidat, skjønte KrF at Senterpartiet kom til å bli grilla på ein heilt ny måte i valkampen.

Og fallet har sett ut til å kome: i august har dei falle med nesten tre prosentpoeng på snittmålingane, ifølgje Poll of polls.

Onsdag kveld kom ein krisemåling frå Kantar for TV2: Senterpartiet vart målt til 11,2 prosentpoeng.

– Det har vært lenge siden et parti har opplevd en så bratt fallkurve i en valgkamp, sier TV 2-valganalytiker Terje Sørensen til kanalen.

Senterpartiets nedtur gjer det også meir sannsynleg at Arbeiderpartiet må inkludere Rødt eller MDG i styringsgrunnlaget.

– Nå er alt i spill, skreiv politisk redaktør Eirin Eikefjord i Bergens Tidende i førre veke.

I KrF legg ein opp til at verdikonservative senterpartiveljarar på vandring skal velje nettopp dei.

Strategien til KrF er ikkje å gå i strupen på Senterpartiet eller å skape konfliktlinjer til dei, fortel godt informerte kjelder i KrF.

Derimot skal dei stille seg synleg som eit sentrumsparti og gjenta at dei er eit parti for barn, familiar og eldre.

Ein tillitsvalt i KrF fortel at det er tre saker dei trur kan vippe Senterparti-veljarar i favør av KrF: Rettferdig fordeling av vaksiner med verdas fattige, klima og internasjonal rettferd.

Ein KrF-kampanje i sosiale medier som spelar på hjarteslag skal kunne nå ut til 400.000. I KrF håper dei at bodskapen skal vere med å fange opp senterparti-veljarar som sit laust.

Dagen si kartlegging av kyrkjeaktive, viser at KrF hadde reint fleirtal i Kristen-Noreg ved stortingsvalet i 2017. Senterpartiet var på fjerdeplass etter Høgre og Arbeiderpartiet.

Sidan den gong har Senterpartiet hatt ein eventyrleg og langvarig vekst på meiningsmålingane.

Då Dagen tidlegare i august var på Sandane i Vestland og møtte listetopp Erling Sande frå Senterpartiet, fortalde han at sentraliseringa hadde sendt veljarar til dei.

– Vi opplever ei tilstrøyming av KrF-veljarar, sa han.

No kan det sjå ut som om tilstrøyminga til Sp har stoppa opp.

Spørsmålet er kven dei går til.

På målinga i TV 2 onsdag kveld, fekk KrF 3,7 prosent. Bakgrunnstala viser at det som bergar dei, er stabile veljarar, ikkje nye veljarar frå andre parti.

Det kan tyde på at KrFs frieri ikkje har blitt teke imot så langt.