Kristen aktivist fryktar tilspissing i klimadebatten: – Farleg retorikk

Torsdag var Joachim Skahjem frå aktivistgruppa Stopp oljeleitinga på NRKs Debatten.

Der opna han for å bruke vald som ein del av klimakampen.

– Det eg definitivt ikkje kan utelukke er at vald vil skje, og det trur eg kjem til å skje, sa han til programleiar for Debatten, Fredrik Solvang.

Molotovcocktail og fyrstikk

På spørsmål om korleis valdelege klimaaksjonar eventuelt ville kunne sjå ut, svara Skahjem:

– Om ein vil bruke molotov cocktail eller fyrstikk er eg ikkje så opptatt av, men det norske folk må få lov til å kjempe imot det statsstøtta Equinor.

Klimaaktivisten sa til Fredrik Solvang at mange av dei som støttar valdsbruk som eit legitimt middel, ikkje nødvendigvis ville utført det sjølv.

Skahjem var samtidig klar på kva han sjølv er villig til.

– Dersom Politiets tryggingsteneste følger med no: Eg ville gjort det.

Reagerer

Leiar for Natur og Ungdom, Gina Gylver, reagerer på Skahjems haldningar.

– I ein desperat situasjon kan ein slik retorikk føre til farlege situasjonar. I ytste grad kan det inspirere andre til å faktisk gjennomføre valdelege aksjonar, seier 21-åringen.

Gylver seier sivil ulydnad er eit legitimt middel å bruke, men at grensa går ved valdsbruk.

Det har lite støtte i miljøa ho kjenner til.

– Eg håpar dette blir slått hardt ned på, og at folk forstår at vi ikkje er med på å legitimere vald.

Eit paradoks

Benedicte Steinbakk jobbar som ungdomsarbeidar i KFUK-KFUM Fana.

Ho har i mange år engasjert seg for klima, og var nyleg på klimatoppmøtet til FN som representant for den kristne organisasjonen.

Steinbakk meiner bruk av vald i klimaaksjonar går imot si eiga hensikt.

– Aksjonane handlar om å redde menneske frå klimakatastrofar, dersom ein brukar vald blir det difor eit paradoks, seier ho.

Polarisering

Steinbakk fryktar at utsegna til Skahjem vil forverre det ho seier er ein allereie tilspissa debatt.

– Det skapar meir polarisering, ikkje berre mot klimakampen, men også mellom oss klimaaktivistar. Det blir eit skilje mellom dei som vil bruke legitime middel, og dei som er villige til å bruke vald.

Ho fryktar for ryktet til klimakampen etter gårsdagens utsegn i Debatten.

– Det gjer jo at den blir ekstrem, mens vi som brukar legitime verkemiddel sit i hundrevis av møter og jobbar hardt for å få gjennomslag.

Forlèt organisasjonen

Fredag kom meldinga om at Skahjem forlèt miljøorganisasjonen Stopp Oljeletingen.

– Eg er einig i avgjerda om at eg går ut av organisasjonen, fordi vi har ulike idear om metodar, seier Skahjem til TV 2.

– Eg vil presisere at eg aldri har tatt til orde for vald mot menneske. Eg vil aldri skadd et menneske, og det er nettopp derfor eg tar til orde for sabotasje av objekta som skader menneske, seier han.